Сергей Липинецнинг ким билан жанг қилиши аниққа ўхшайди

Россиялик боксчи Сергей Липинец навбатдаги жангини 2021 йил февраль ёки март ойи бошларида ўтказади.

Спортчининг менежери Aлекс Вайфельднинг таъкидлашича, Липинецнинг рақиби Эррол Спенс - Дэнни Гарсия жангидан сўнг маълум бўлади.

“Жанг февраль ойининг охири ёки мартнинг бошларида ўтказилиши режалаштирилган. Рақиб Эррол Спенс - Дэнни Гарсия жангидан сўнг аниқланади. Шон Портер билан жанг қилиши ҳам мумкин, бу музокаралар босқичида”, - деди Вайфельд.

Маълумки, октябрь ойида Липинец ярим ўрта вазн тоифасида IBFнинг вақтинчалик жаҳон чемпионлик камари учун канадалик Кастио Клэйтонга қарши жанг ўтказди ва бу дуранг билан якунланганди. Аслида, бу титул учун россиялик боксчи ҳамюртимиз Қудратилло Абдуқаҳҳоров билан жанг қилиши керак эди. Бироқ юртдошимизда виза борасидаги муаммолар туфайли, бу жангга бора олмаган ва унинг ўрнини юқорида таъкидлаб ўтганимиздек, канадалик Клэйтон тўлдирганди.

31 ёшли Липинец профессионал боксда 18 та жанг ўтказган ва 16 бора ғалабага эришган (12 таси нокаут билан).

Матнда хатолик топсангиз, ўша хатони белгилаб, бизга жўнатинг (Ctrl + Enter)