Сергей Лушчан: "Жамоамизнинг потенциали катта деб ўйлайман"

Суперлиганинг 4-туридан ўрин олган “Нефтчи” – “Навбаҳор” (3:2) учрашувидан кейинги матбуот анжуманининг биринчи қисмида меҳмонлар бош мураббийи Сергей Иванович Лушан иштирок этиб, ОАВ ходимларининг саволларига жавоб берди. 

Сергей Иванович одатдагидек, ўз сўзини ўйин ҳақидаги фикрлари билан бошлади.

- Менимча, бугунги учрашувга ортиқча изоҳнинг ҳожати йўқ. Ўйин томошабоп, дербига хос, эмоцияларга бой тарзда кечди. Ҳар икки жамоада ҳам хатолар юзага келди. Ўз имкониятидан самарали тарзда фойдалана олган жамоа ғалаба қозонишга муваффақ бўлди. Бу ерда ортиқча гапнинг кераги йўқ. 

- Сизнингча, захирадан майдонга тушган футболчилар ўзларини қанчалик оқлашди? Изоҳларда алмаштиришлар ўзини оқламади, деган фикрлар янграмоқда... 

- Нима учун шундай фикрларни билдираётганлар уч нафар ҳужумчини майдонга туширганимиз борасида индашмаяпти. Алмаштиришларни амалга оширишдан мақсадимиз, қанотларни кучайтириш эди. Боиси, қанотлардан уч марта дарвозамизга хавф солинди. Захирадан майдонга тушган футболчилар ўз имкониятлари даражасида ўйин намойиш эта олмаганликлари уларнинг ёмон ўйинчилар эканлигини англатмайди. Ўша йигитлар аввалги баҳсда  асосий таркибда майдонга тушиб, энг яхши футболчилар бўлишганди. Захирадан майдонга тушадиган ўйинчиларнинг қандай фойда келтиришларини олдиндан тахмин қилиб бўлмайди. Менимча, таркибимиздаги футболчиларнинг ҳаммалари маҳоратли ўйинчилар ҳисобланишади. Уларнинг барчаларига ўйнаш учун имконият бериш керак.   
Биз мазкур ўйиннинг 65-дақиқасидан бошлаб, темпни йўқотдик. Шу боис, жамоага “янги қон” зарур эди. Захирадан майдонга тушган йигитлар ўз имкониятлари даражасида ўйин намойиш эта олишмаган бўлса-да, рақиб томонидан урилган голларда уларнинг айблари йўқ. Ўз жарима майдончамиз ичида иккита қўпол хатога йўл қўйиб, ўзимизга ўзимиз голлар олиб келдик. Сизнинг мантиғингизга кўра, хатога йўл қўйган барча футболчилар, энг аввало дарвозабонни алмаштириш лозим эди. Шундайми? Биз майдондаги вазиятдан келиб чиқиб, ўйинда ўзгартиришлар қилишга ҳаракат қиламиз. Бу эса айрим пайтларда самара келтирса, баъзи вақтларда ўзини оқламайди. “Навбаҳор”да иккинчи мавсум фаолият юритаётган бўлсам, кўпчилик ўзича мутахассис сифатида маслаҳатлар беради. Лекин ҳеч ким қўлига секундомер ва ҳуштакни олган ҳолда, машғулотлар ўтказмайди. Шунинг учун бундай фикрларга хотиржам ҳолда ёндошаман.

- Жиззахда “Сўғдиёна”га қарши кечган учрашувнинг биринчи бўлимида “Навбаҳор” хотиржам ҳолда ўйнаган бўлса, иккинчи бўлимда тезкор ўйин намойиш этди. Шунингдек, захирадан майдонга тушган футболчилар ўша беллашувда ўзларини кўрсатиб, ғалабага муносиб ҳиссаларини қўшишди. Бугунги учрашувнинг биринчи бўлимида шогирдларингиз тезкор ўйин намойиш этишган бўлса, иккинчи бўлимда, айниқса, 60-дақиқадан кейин “Навбаҳор”нинг ўйинида бироз пасайиш сезилди. Бу футболчиларнинг жисмоний ҳолатларига боғлиқ ҳолатми ёки ўзига хос тактикамиди?

- Қанақа тактика? Биз ҳимоявий ўйин намойиш этишга ҳаракат қилдик. Бунинг яхши ва салбий томонлари бор. Кўплаб хатоларга йўл қўйган ҳолда рақибларга голлар уриш учун имконият беряпмиз ҳамда голларни ўзимизга ўзимиз олиб келяпмиз. Бу жамоамиз ўйини энди шаклланаётганлиги билан боғлиқ. Таркибимиздаги футболчилар турли жамоалардан келишган ва уларнинг ўйинларини ўзаро уйғунлаштириш лозим. Биз жамоавий ўйинни шакллантириш ҳамда таркибни ўзгартиришга интиляпмиз. Мазкур баҳсдан олдин ҳам икки нафар футболчимиз майдонга туша олмайдиган бўлишди ва уларнинг ўринларини тўлдиришимизга тўғри келди. Бу энди бизнинг муаммомиз. Менимча, жамоа ўйинида пасайиш бўлмади. Аксинча, яна бир марта такрорлайман, голлар йўл қўйилган хатолар эвазига урилади. Биз бугунги беллашувда рақибдан кўра, кўпроқ хатога йўл қўйдик. Бизда иккита вазият юзага келди, лекин бундан фойдалана олмадик. Мезбонлар эса фойдаланишди. Ушбу вазиятлар дарвозабонимизга ўз таъсирини ўтказадими? Менимча, у яхши савияли кипер. Хатони эса барча қилиши мумкин. Шундай бўлса-да, жамоанинг потенциали катта деб ўйлайман. Чунки таркибнинг шаклланаётганига эндигина 2,5 ой бўлди. Шу боис, хотиржам ҳолда ишлашда давом этамиз, агар бунга имконият беришса (кулади).

- Ўтган турда “Андижон”га қарши кечган учрашувда бошланғич таркибдан жой олган футболчилардан айримлари бугун захирада қолдирилди. Ротацияни амалга оширишдан мақсад нима эди?

- Ўринбоевнинг жароҳат олганлиги икки кун олдин маълум бўлди. Дарвозабонларни алмаштиришдан мақсад эса уларнинг ўзига хос кучли ва заиф томонлари бор. “Нефтчи”нинг прессинг қилишини кутгандик. Умиджон Эргашевга қараганда, Шукрон Йўлдошев оёғида яхши ўйнайди. Йўлдошевнинг ҳам ўзига хос яхши ва заиф томонлари бор ҳамда айни пайтда шу борасида иш олиб боряпмиз.

- Мирзоҳид Ғофуровнинг жароҳати жиддий эмасми?

-  Унинг оёғида оғриқ юз берди. Барчаси тиббий кўрикдан сўнг, маълум бўлади.

- Ўзбекистон Футбол ҳакамлари марказининг собиқ раҳбари Лазиз Қўчқоровнинг “Навбаҳор” клубида иш бошлагани борасидаги хабарлар қанчалик ҳақиқатга яқин?

- Мен клубнинг ишига аралашмайман. Фаолиятим жамоанинг майдондаги ҳаракатлари билан боғлиқ. Шунинг учун бу борада ҳеч нарса дея олмайман. Бундай масалаларни клуб раҳбарияти ҳал қилади. 

- “Навбаҳор” Суперлига доирасидаги ўйинларда қаторасига иккита “водий дербиси”да иштирок этди. Энди Ўзбекистон кубоги гуруҳ босқичидан ўрин олган баҳсда яна “Нефтчи”га қарши майдонга тушади. Бу борадаги фикрингиз...

- Мухлислар учун бу ёқимли ҳолат. Бундан ташқари, энди “Нефтчи”ни ўз майдонимизда қабул қиламиз. Кўрамиз. Бу футбол.

- Ўша учрашувда бошланғич таркибда қайси футболчилар жой олишади?

- Ким ўйинга тайёр бўлса, ўша ўйинчилар майдонга тушишади.