Сергей Лушчан: Шомуродовнинг Европага ўтгани қолганларни ҳам руҳлантириши керак

Про-лигадаги кураш қизғин палласига кирмоқда. Энди кучли тўрт клуб – “Нефтчи”, “Шўртан”, “Турон” ҳамда “Динамо” Суперлига йўлланмаси йўлида жиддий кураш олиб боради. Агар ушбу жамоаларга устозлик қилаётган бош мураббийларга қарасак, уларнинг орасида ном ва тажриба жиҳатидан Сергей Лушчан ажралиб туриши мумкин. Чунки у бир неча йил давомида “Бунёдкор”га устозлик қилган. Қолаверса, “Сўғдиёна”да ҳам ишлаб кўрди.

Энди эса гўёки ҳаммасини бошидан бошлашни истагандек, про-лигада самарқандликларни Суперлигага олиб чиқиш учун таклиф этилди. Хўш, Лушчан олдига қўйилган вазифани қанчалик уддалай оларкин? Бу ҳам ўзига яраша кузатиш мумкин бўлган қизиқ жараён. Лушчан эса шу ва яна бошқа масалалар бўйича Sports.uz мухбирининг саволларига жавоб қайтарди.

-  Сергей Иванович, “Динамо” қийинчилик билан бўлса-да, кучли тўртликка кира олди. “Динамо”ни  Суперлигага олиб чиқишга қанчалик ишоняпсиз? Боиси, рақобат янада кучли бўлади...

-  Албатта ишонаман. Биз пешқадамдан олти очкога ортда қоляпмиз. Аммо ҳамма кураш ҳали олдинда. Кўп нарса биринчи ўйинга боғлиқ бўлиб қолади.

-  Умуман айтганда, илк бор про-лигада ишлаётган мураббий сифатида айтинг-чи, у ерда савия ҳамда мавқе қандай экан? Сиз ўйлагандан яхшироқми ёки ёмонроқми?

-  Бу борада ҳеч нарса дея олмайман. Устига устак коронавирус туфайли жуда кўп ўйинлар вақтида ўтказилмасдан қолди. Шу боис чемпионат кутилган даражада чиқмади. Биз охирги паллага қадар ўйинлар қачон ўтказилишидан бехабар қолдик. Ўз навбатида бу ҳолат машғулот жараёнига салбий таъсир ўтказмасдан қолмади. Бунинг натижасида нафақат жамоалар, балки бутун чемпионатнинг сифати пасайиб кетди.

-  Кўпчилик Суперлигадан кўра, про-лигада ишлаш қийинроқ дейишади. Шу фикрга сиз ҳам қўшиласизми?

-  Агар фақат футболчиларнинг сифатларини эътиборга оладиган бўлсак, ўз-ўзидан Суперлигадаги ижрочиларнинг савияси про-лигадагиларга нисбатан баландроқ. Ўз ўрнида, бундай ижрочилар билан ишлаш мураббий учун қизиқарли. Умуман айтганда, Ўзбекистоннинг бу икки лигасида ишлаш мураббийдан катта куч талаб қилади. Нега деганда, ҳар бир жамоада дарҳол натижа талаб қилишади. Лекин, менимча рақобатбардош клубни шакллантириш учун мураббийга камида уч йил керак бўлади. Фақат шундан сўнггина ундан юқори натижаларни талаб қилиш мумкин.

лушан_2

-  Про-лигада иккинчи ўрин эгаси плей-оффда ўйнайди. Балки шу мақсад ҳақида ўйлаётгандирсиз, нима деб ўйлайсиз?

-  Биз ҳар қандай вариантларни ўрганиб чиқяпмиз. Албатта, ўз-ўзидан маълумки, асосий мақсад Суперлига йўлланмасига эга чиқиш.

-   “Динамо”да ишлаш орқали Лушчаннинг қандай мутахассис эканлигини исботлаш ниятингиз борми? Ёки бундай истак сизга қўшимча босим ўтказиши мумкинми?

-  Мен бир йил футболдан дам олдим. Шу вақт давомида балиқ овладим. Чунки балиқ овини жуда яхши кўраман. Балиқ овлар экансиз, ҳамма нарса ҳақида бемалол ўйлашингиз мумкин бўлади. Бунга қадар мен 8 йил мобайнида таътилсиз ва дам олиш кунларисиз ҳам ишладим. Ўз ўрнида бундай меҳнат саломатлигимга таъсир кўрсатмасдан қолмади. “Динамо”дан таклиф олганимдан сўнг, узоқ ўйлаб ўтирмадим. Чунки ижодий танаффусни поёнига етказиб, тўхтаб қолган мураббийликни қайта бошлашим керак эди. Биз раҳбарият билан ҳаммасини гаплашиб олдик. Бу иш менга ўзига яраша амалиёт, клуб учун эса натижа бўлиб хизмат қилади. Қолганини мавсум якунига етганидан сўнг билиб оламиз. Агар юқоридагилар жамоада қолишимни исташса қоламан, исташмаган тақдирда эса раҳбарият билан яхшиликча хайрлашаман. Бундай йўл тутиш менга ёқади.

-  Сизда ўзига яраша тажриба бор. “Динамо”даги футболчилар сизнинг фалсафангиз ва нимани хоҳлаётганингизни тўлиқ тушуниб етишдими?

-  Бундай фикрларга қисман қўшилиш мумкин. Боя айтганимдек, яхши ва рақобатбардош клубни шакллантириш учун камида уч йил керак бўлади. Мен эса “Динамо”га беш ойдан бери устозлик қиляпман холос. Албатта, ҳаммага оғир: биз мураббийларга ҳам, футболчиларга ҳам.

лушан4_1

-   “Динамо”да шундай одат борки, клуб Суперлигага чиқса яна қуйи лигага тушиб кетаверади. Клуб про-лигада фаворит, элитада эса аутсайдерга айланиб қолаверади. У ерда ишлаётган мутахассис сифатида бунинг жавобини топдингизми?

-  Ҳар бир клубнинг ўзига яраша муаммолари бўлади. Бу йили “Динамо”ни про-лиганинг фаворити дея аташ тўғри бўлмасди. Бироқ биз клубни про-лигадан Суперлигага олиб чиқсак, юқоридаги анъана ўзгаради. Клубни шакллантириш учун ҳар томонлама ўйланган стратегия керак бўлади. Ишни фақат жамоанинг олдига жиддий вазифаларни қўйиш билан олиб бориш тўғри эмас. Клубни ривожлантириш учун академияни кучайтириш зарур. Ўз тарбияланувчиларига таяниш эса ҳар қандай жамоага омад келтиради. 

-  “Бунёдкор”да ишлаётган пайтингизда қўл остингизда ҳозирда Россиянинг ЦСКА клубида тўп сураётган Бахтиёр Зайнутдинов кўрикдан ўтган экан. Ўшанда уни нима учун олиб қолмагандингиз? Ёки ўзини кўрсата олмаганми?

-  У бизда бор йўғи икки ҳафта бўлган. Боз устига уни дарҳол академиядан олишимизга Қозоғистон фуқароси эканлиги имкон бермаганди. Чунки уни жамоага жалб этиш ва яшаши учун жой топишда бизда имкон йўқ эди. Шундай бўлса ҳам мен ўшанда федерация президенти ҳузурига кирганман. Лекин Зайнутдиновни олиб ўтиш ҳақидаги фикримни рад этгандилар. Бунинг учун икки йил кутишимиз кераклигини ҳам гап орасида қисқтириб ўтишган. Агар дастлабки таклиф ижобий ҳал этилганда биз Бахтиёрни анча оёққа қўйган бўлардик.

-  Зайнутдиновни кейинчалик  Россияда ўйнаб кетишини кутганмидингиз?

-  Мен нафақат Зайнутдинов, балки “Бунёдкор” академиясидан чиққан ҳар бир йигитнинг футболда юқори натижаларга эриша олишига ишонаман ва буни кутиб қоламан. Қолаверса, биз фақат ўз киссаларимизни пулларга тўлдириш ҳақида эмас, балки ўзбек футболини юқори чўққиларга кўтариш мақсадида ишлаганмиз. Энг асосийси, бизда бу иш ижобий якунланиб келяпти.

-  Шунингдек, қўл остингизда ўйнаган Элдор Шомуродовнинг кейинчалик Италия А серияда ўйнашини билармидингиз? Унинг имкониятларини бошқалардан кўра яхшироқ билган мутахассис сифатида ундан Италияда нима кутяпсиз?

-  Ўзим шуғуллантирган ҳар бир ўйинчида ақлбовар қилмас даражадаги потенциал бор. Улар энг яхши чемпионатларда тўп суришга муносиб. Аммо ҳаётда ҳаммаси киши истагандек бўлавермайди. Кимгадир омад кўпроқ кулиб боқса, яна кимнидир четлаб ўтади. Энг муҳими, ўзим ишлаган йигитларнинг ҳаммаси, жумладан Шомуродов ҳам жуда яхши инсон. Ўйлайманки, унинг Италия А сериясида тўп суриши ўзбек футболига катта ёрдам беради. Ўз навбатида бошқалар Элдордан руҳланган ҳолда ўз маҳоратларини сайқаллашга зўр берадилар.

лушан2_1

-  Мураббий сифатида ўзбекистонлик қайси ҳамкасбингизни энг зўри деб айта оласиз?

-  Яхши мураббийлар етарлича. Менга ҳаммасидан кўра, Рўзиқул Бердиевнинг ишини кузатиш ёқади. У “Насаф”ни жуда яхши бошқариб келяпти. Бердиев клуб тизимига асосан маҳаллий ёшларни жалб этяпти. Маҳаллий ижрочиларга таянган клубларнинг эса келажаги порлоқ бўлади.

-  Сизнинг орзуингиз нима?

-  Буни сир тутганим маъқул. Акс ҳолда орзуим амалга ошмай қолиши ҳам мумкин.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)