Шаҳзод Убайдуллаев: "Энергетик"дан кетаман"

Беларусь чемпионатининг 24-турида “Энергетик-БГУ” “Витебск” билан куч синашиб 2:2 ҳисобида дуранг натижа қайд этганидан хабардорсиз.

Ўша беллашувда ҳамюртимиз Шаҳзод Убайдуллаев рақиб дарвозасига акробатик тарзда гол уришга эришди. Sports.uz мухбири эса ушбу легионеримизга айрим саволлар билан мурожаат қилди.

- Жанговар дурангдан кейин нима деган бўлардингиз?

- Ўйин ҳақида гапирадиган бўлсак, жуда қийин бўлди. Майдонга фақат уч очко учун тушгандик. Лекин бунинг уддасидан чиқа олмадик. Ҳимояда бироз хатолар бор. Шунинг натижасида ўйинларда қийналяпмиз.

- Рақиб дарвозасига чиройли гол урдингиз. Бунга қандай таъриф берасиз?

- Урган голимга ҳеч қанақа таъриф бера олмайман. Шунчаки, менга шундай голлар уриш ёқади, шу холос.

- Игнатий Нестеров қўриқлаётган дарвозага ҳам акробатик ҳолатда гол урганингиз ёдимизда. Фаолиятингизда қайси гол энг чиройлиси?

- Барибир Игнатий Нестеровга урган голимни чиройли деб ҳисоблайман. Чунки Нестеров Осиёнинг кучли дарвозабонларидан бири бўлган ва ҳозир ҳам шундай. Унга бундай гол уриш жуда қийин.

- Кейинги режангиз қандай?

- Худо хоҳласа, чемпионат тугаса кўрамиз. Лекин аниқ биламанки, “Энергетик”дан кетаман. “Шахтёр” билан яна икки йиллик шартномам бор. Нима бўлишини вақт кўрсатади. Балки “Шахтёр”га қайтарман, балки бошқа жамоага!