«Жорий мавсум якунига етганидан сўнг, «Шальке-04»дан «Бавария» клубига кўчиб ўтадиган дарвозабон Александер Нюбелнинг ота-онасига таҳдидлар бўлмоқда», - дея хабар бермоқда «Abendzeitung Munich» нашри.

«Шальке-04» клуби ишқибозлари посбоннинг ота-онасига ишхонасида таҳдид қилишган. Шу сабаб Падерборн шаҳридан унча узоқ бўлмаган жойда истиқомат қиладиган Нюбеллар оиласи таътил олишган ва саёҳатга жўнаб кетишган.

Январь ойида «Бавария» клуби ўз расмий сайти орқали «Шальке-04» дарвозабони Александер Нюбель билан шартнома имзоланганини эълон қилган. Иқтидорли посбон мюнхенликлар жамоасига 1 июль куни кўчиб ўтади. Унинг «Голливуд ФК» билан имзолаган битими эса 5 йилга мўлжалланган.

Шунингдек, аввалроқ Нюбелнинг «Шальке-04» билан тузилган шартномасини узайтиришдан бош тортгани ва 2019/20 мавсум якунига етганидан сўнг клубни тарк этиши маълум бўлганди. Шу тариқа, дарвозабон «Бавария»га бепулга тушмоқда.

Эслатиб ўтамиз, Нюбель «Падерборн» клуби тарбияланувчиси саналади. «Шальке-04»га у 2015 йилнинг ёзида кўчиб ўтган. Ўшанда Александернинг трансфер суммаси 600 минг еврони ташкил этганди. Жорий мавсум Нюбель бундеслига доирасида 15 та учрашувда иштирок этди.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)