“Сити” ҳам, “Ливерпуль” ҳам керакмас, кетаман!

“Кристал Пэлас” билан шартномаси якунланиб бораётган жамоа сардори Марк Гехи фаолиятини Англия Премьер-лигасидан ташқарида давом эттириши мумкин.

25 ёшли марказий ҳимоячи ёзда “Ливерпуль”га ўтишга яқин эди. Бироқ “Кристал Пэлас” Гехига муносиб ўринбосар топа олмагани учун ўз етакчисини Арне Слот жамоасига қўйиб юбормади.

Бу трансфер амалга ошмагач, Марк Гехига даъвогарлик қилаётган клублар сони ортиб бормоқда. Хусусан, “Манчестер Сити” ҳимоячи трансфери бўйича фаворит сифатида эътироф этилмоқда.

Mirror нашрининг маълум қилишича, Гехининг режаси ўзгарган. Маҳоратли ўйинчи ўзининг агентларига “Реал Мадрид” клубига кўчиб ўтиш истаги борлигини ва айнан мана шу йўналиш бўйича ишлашни айтган.

“Реал” эса, замонавий футболнинг энг ёрқин истеъдодларидан бирини эркин агент сифатида бепул қўлга киритишга умуман қаршилик қилмайди.