Shavkat Mullajonov: "Murabbiylikda hali o‘rganadigan narsalarim ko‘p, bu menga imkoniyat"

Birinchi ligada ishtirok etayotgan “Olimpiya” jamoasi O‘zbekiston Kubogi guruh bosqichida ishtirok etdi. “F” guruhidagi oxirgi o‘yinini Farg‘onada “Andijon”ga qarshi o‘tkazishdi va yirik 6:0 hisobida imkoniyat boy berildi.

Uchrashuvdan so‘ng “Olimpiya” bosh murabbiyi Shavkat Mullajonov savollarga javob berdi.

- Birinchi navbatda “Andijon” jamoasini g‘alaba bilan tabriklayman. O‘yinga keladigan bo‘lsak, bizni tayyorlangan taktikamiz o‘tdi, deb hisoblayman. Faqat o‘yinchilarimiz yosh bo‘lgani uchun standart vaziyatlarda yutqazdik. Ko‘p gollarni standartdan o‘tkazdik. Havodagi kurashlarda ham yutqazdik. Yigitlarimdan roziman, o‘yin menga yoqdi. Men aytgan narsani ko‘rsatib berishdi.

- Kubok bahslarida “Olimpiya”ni “Olimpik” va “Navbahor” bilan bahslarida bu darajada yirik hisob qayd etilmagandi. Bugun esa “Andijon”ga yirik hisobda mag‘lubiyatga uchraganinglarni asosiy sababi nimada, deb o‘ylaysiz?

- Tayyorgarligimiz har xil. Undan oldin ham o‘ynadik. Jamoamizda ko‘p yo‘qotishlar bor. “Navbahor” bilan uchrashuvda boshqa tarkib o‘ynagandi. Bundan oldin ham aytganman, yarim futbolchilarimiz terma jamoaga ketishgan. Bor o‘yinchilar bilan harakat qilyapmiz. Hammasiga imkoniyat beramiz. Maqsadimiz futbolchi etkazib berish. Natijaga kelsak, hozir aytganimdek, havodagi jangda yutqazdik. Gollarimizni standartlardan o‘tkazdik. Qolgan vaziyatlarda biz aytgan narsa bo‘ldi. Oldimizda “Nurafshon”ga qarshi o‘yinimiz bor. Ushbu uchrashuv oldidan bu bahsda futbolchilar biz aytgan taktikada o‘ynashdi. Ko‘nglim to‘ldi. Natijadan ko‘nglim to‘lmagan bo‘lsa-da, bizda 15-16 yoshli iqtidorli yigitlar mavjud va bir-ikkita kattasi bor, 18-19 yoshli. Asosan bizda 2006 va 2007 yillarda tug‘ilgan o‘yinchilar jamlangan. Men ularga asosan futbol o‘ynashni o‘rgatyapman xolos. Futbol o‘ynashni o‘rganib olishganidan keyin natija kelaveradi. O‘yin yanada o‘zgaraveradi.

- “Andijon”da to‘p surgansiz, bu jamoa orqali katta futbolga kirib kelgansiz. Sobiq klubingizni Superligadagi salohiyatini qanday baholagan bo‘lardingiz?

- “Andijon” juda tartibli o‘yin ko‘rsatyapti. O‘yinlarini ko‘rib chiqdim. Hamma joyda murabbiyning qo‘li ko‘rinib turibdi. Ayniqsa, standart vaziyatlarda. Biz shu narsaga qarshi ming harakat qilgan taqdirimizda ham bolalar bo‘yi bilan ham yordam bera olmadilar. Lekin “Andijon”ni o‘yini yoqyapti.

- Uchrashuv boshidan qaydnomada 4 ta hujumchi tushirganingizni ko‘rdik. Bundan qanday taktikani ko‘zlagandingiz?

- Yo‘q, 4 ta hujumchi tushirmadim. 3 ta hujumchi va ularning ortidan bir nafar hujumkor futbolchi o‘ynadi. Bu uchrashuvga maqsadimiz o‘rtani yopib, qanotlarni ochish edi. Ko‘plab hujumlari markazdan bo‘lgani sababli biz bugun o‘rtani yopishga harakat qildik. Baribir kuch masalasida ham seziladi. Chunki raqib Superliga jamoasi va xorijlik o‘yinchilari bor. Baribir biz aytgan narsani 100 foiz qilib bera olmaydilar. Hammani kuchi har xil. Bular o‘sib kelayotgan yoshlar bo‘lgani uchun o‘zimiz istagan darajaga olib chiqishga harakatdamiz.

- “Andijon” muxlislariga nima deya olasiz?

- “Andijon” ishqibozlari har doimgidek quvnoq. Birinchi o‘rinda deb o‘ylayman.

- “Olimpiya” birinchi ligada ishtirok etyapti. Jamoani oldiga qo‘ygan vazifasi qanday va shu bilan birga murabbiy sifatida rejalaringiz nimalardan iborat?

- “Olimpiya”ni maqsadi “Odil Junior”dan futbolchi etkazib, O‘zbekiston termasiga, klublariga munosib tarbiyalash. O‘zimga kelsak, bu jamoani qishda qabul qilib olgan bo‘lsam, hali ko‘p ishlashim kerak. Hozircha o‘rganyapman. Murabbiylikda o‘rganadigan narsalarim ko‘p. Bu menga imkoniyat. Bolalarni tarbiyalash va o‘zimga ham o‘rganishim uchun yaxshi deb o‘ylayman. Futbolchi sifatida o‘ynaganimiz boshqa narsa. Murabbiylik esa boshqa. Bular ikki xil narsalar.