Sherki bu ko‘rsatkich bo‘yicha Brunu Fernandeshni ortda qoldirdi

"Manchester Siti" hujumkor yarim himoyachisi Rayan Sherki "Chelsi"ga qarshi yakshanba kuni bo‘lib o‘tgan bahsning (3:0) asosiy qahramonlaridan biri bo‘ldi.

Fransiyalik futbolchi uchrashuvda ikkita golli uzatma muallifiga aylandi. U 51-daqiqada Niko O’Rayliga assist qilgan bo‘lsa, 57-daqiqada uning pasidan keyin Mark Gexi raqib darvozasini ishg‘ol qildi.

"Opta" ma’lumotiga ko‘ra, bu Sherki uchun joriy mavsumda barcha musobaqalar doirasida ikkita yoki undan ko‘p assist qayd etgan to‘rtinchi o‘yin bo‘ldi. Bu esa Premyer-ligadagi barcha futbolchilar orasida eng yaxshi ko‘rsatkich hisoblanadi.

22 yoshli havbek bu borada "Manchester Yunayted" sardori Brunu Fernandeshni ortda qoldirdi. Portugaliyalik yulduz hisobida bunday uchta o‘yin mavjud.

Umuman olganda, Sherki bu mavsum 43 ta uchrashuvda 13 ta golli uzatma va 9 ta gol bilan jamoasining muhim futbolchilaridan biriga aylanib bormoqda.