Шомуродов – “авлиё”! Элдорнинг гаплари тўғри чиқди
“Рома” футболчилари А Серия ўйинлари якунланишига уч тур қолганида ғалаба қозониб, Европа Чемпионлар лигаси сари яна бир катта қадам ташлади.
Римликлар 35-турни жиддий рақиб – “Фиорентина”га қарши ўтказди. Учрашув қаҳрамони бу гал ҳам Элдор Шомуродов бўлди. Биринчи бўлим якунланиши арафасида ўзбек легионери қийин вазиятда турганига қарамай, тўпни боши билан ўта қулай позицияга чиққан Артём Довбикка етказиб берди.
Украиналик форвард Шомуродовдан келган тўпни Давид де Хеа дарвозасига жойлаб қўйди. Бу гол учрашув давомида ягоналигича қолди ва “бўрилар”га навбатдаги уч очкони келтирли.
Эътиборлиси, Элдор Шомуродов ўтган турда ҳам ягона голга ассистентлик қилиб, “Рома” мухлислари меҳрини қозонган эди.
Шу ўринда қизиқ бир ҳолатга эътибор қаратиш лозим. Ўзбекистон миллий терма жамоаси ҳужумчиси “Фиорентина”га қарши беллашув олдидан олдинги чизиқда Артём Довбик билан ўйнаш самарали эканини таъкидлаган эди.
“Олимпико”даги учрашувда Элдор Шомуродов интервьюдаги гапларини амалда ҳам исботлаб қўйди.
Sports.uz портали ўзбек футболчисининг ўйин олдидан SKY ҳамда DAZN нашрлари журналистларига берган қисқа интервьюсини ўзбекистонлик футбол ишқибозлари эътиборига ҳавола қилади.
- “Рома”нинг шиддатли ўйинлари сизга ёқяптими?
- Ҳа, менга маъқул келяпти. Биз шиддатли ўйин кўрсатяпмиз, рақиб кимлигининг аҳамияти йўқ, энг муҳими – ғалаба қозониш.
- Иккита марказий ҳужумчи билан ўйнаш рақибларни кўпроқ қўрқитяптими?
- Йўқ, Биз бу борада хотиржаммиз. Артём Довбик билан бир биримизни яхши тушуняпмиз, кўп мулоқот қиламиз. Аслида бизга бир биримиз ёки бошқа ўйинчилар билан бирга ўйнашнинг унчалик катта фарқи йўқ. Биз ҳар доим тайёрмиз.
- Довбик билан ўйнаш қандай экан?
- Иккимиз ҳам ҳужумчимиз. Қандай ўйнаш ва нима қилишни яхши биламиз. Бу ишимизни анча осонлаштиради.
- Ўзаро бир бирини англаш юзага келдими?
- Ҳа, шундай бўлди.
- “Рома”нинг сири нимада?
- Сизга бу сирни очолмайман (кулади). Ўйлашимча, майдонда бор кучни бериб ҳаракат қилиш керак ва шундан кейин натижага қараса бўлади. Мана ўша сир.
- Клаудио Раньерига таъриф беринг...
- Мураббийимиз – ажойиб инсон. Мендан нима хоҳлаётганини тушунаман ва мендан талаб қилаётганиларини тўлиқ бажаришга ҳаракат қиламан.
Эслатиб ўтамиз, Элдор Шомуродов жорий мавсумда А Серия, Италия кубоги ва Европа лигасида жами 34 та учрашувда иштирок этиб, еттита гол ва бешта ассист муаллифи бўлди.
Фикрлар