Шомуродов - арзон жамоанинг қиммат ўйинчиси!

Футболда бирор жамоанинг муваффақиятга эришиши асосан таркибда қандай футболчилар жамланганига боғлиқ.

Ўз ишининг устаси ҳисобланган ва маҳоратини ўйинлар давомида намойиш этиб келаётган ўйинчиларнинг нархи ҳам қиммат бўлади. Европанинг кучли чемпионатларида ғолиб чиқаётган аксарият жамоалар ўз лигасида энг қиммат таркиб эга.

Бунга “Манчестер Сити”, “Бавария”, ПСЖ, “Наполи”, “Реал” ёки “Барселона”ни мисол қилиш мумкин.

Қизиғи шундаки, айрим юлдуз футболчиларнинг трансфер суммаси бир неча жамоаларнинг тўлиқ таркиби нархидан қиммат ҳисобланади.

Трансферларга ихтисослашган Transfermarkt портали Италия чемпионатида ўйнаётган футболчиларнинг трансфер суммаси янгиланганидек кейин А Серия жамоалари таркибининг умумий қийматини ҳисоблаб чиқди.

Унга кўра, бугунги кунда А Сериянинг энг қиммат таркибини амалдаги чемпион “Наполи” жамлаган.

Transfermarkt портали экспертлари “Наполи” сафидаги ўйинчиларнинг умумий трансфер суммаси 588 миллион еврони ташкил этишини маълум қилди.

Кейин ўринларда Миланнинг икки гранди – “Интер” ва “Милан” эгаллаб турибди. “Интер” таркиби чемпиондан сал арзонроқ – 563 миллион еврога баҳоланган. “Милан” жамоаси ўйинчиларининг умумий трансфер қиймати 543 миллион еврони ташкил қиляпти.

Таъкидлаш жоизки, сўнгги учтада чемпионатда мана шу уч жамоа галма-галдан Скудеттони қўлга киритди. Демак, таркибда гап кўп.

А Сериянинг энг қиммат таркиблари ўнлиги қуйидагича кўриниш олди. Юқоридаги уч жамоадан ташқари, қолган клублар статистикасига эътибор қаратамиз. “Ювентус” – 420 миллион евро, “Рома” – 362 миллион евро, “Аталанта” – 325 миллион евро, “Лацио” –  280 миллион евро, “Фиорентина” – 255 миллион евро, “Торино” – 186 миллион евро ва “Болонья” –  166 миллион евролик таркибга эга.

Элдор Шомуродов тўп тепаётган “Кальяри” таркиби энг арзон бўлган икки жамоадан бири. Transfermarkt портали маълумотларига кўра, сардинияликлар жами 70 миллион евролик футболчиларни ўйнатяпти. А Сериянинг энг арзон таркиби “Фрозиноне”да. У 63 миллион еврога баҳоланган.

Эътиборли жиҳати шундаки, Элдор Шомуродов ўз жамоасининг энг қиммат икки ўйинчисидан бири ҳисобланади. Transfermarkt портали ўзбек легионерининг трансфер суммаси 6 миллион евро эканини кўрсатган. 

“Кальяри” вакиллари орасида энг қимматбаҳо ўйинчи сифатида ҳужумчи Андреа Петанья қайд этилган. Тажрибали чарм тўп устасининг бугунги кундаги трансфер суммаси 7,5 миллион евро.

Сардиния клубининг энг қиммат футболчилари учлигини Уругвай терма жамоаси вакили Найтан Нандес якунлаб турибди. Маҳоратли ярим ҳимоячи айни пайтда 5 миллион еврога баҳоланган.

Файзуллаев қойиллатяпти!

Файзуллаев “юлдузлик касали”га учрадими?