Шомуродов гол урди ва ўзини қийнаган “қора анъанага” чек қўйди!
Италия А Сериясининг 23-тури доирасида “Женоа”нинг “Верона”га қарши ўтказган учрашув драматик кўриниш олди. Биз учун кутилмаган жиҳат, Элдор Шомуродов ва Горан Пандевнинг бошланғич таркибга киритилмагани бўлди. Бу гал Давиде Баллардини асосий тўрурар Маттиа Дестро билан Марко Пьяцани туширишга қарор қилди.
Шомуродовнинг захирада қолдирилишини унинг яқинда жароҳатидан таклангани ва ҳал тўлиқ ўйнаш учун жисмоний ҳолати тайёр эмаслиги билан изоҳлаш мумкин. Аввалги ўйинда ҳам легионеримиз фақат иккинчи бўлимда тўп тепганди.
Элдор ўйинга қўшилиши билан илк уринишдаёқ ўзини кўрсатди. Дарвозабон Маттиа Периннинг узоқдан йўллаган зарбасини Дестро боши билан олдинга ташлаб берди. Ҳимоячи билан курашда устун келган ўзбек ҳужумчиси аниқ зарба билан кам гол ўтказадиган рақиб посбони Марко Сильвестрини доғда қолди.
Голдан руҳланган генуялик футболчилар ўйинни кучайтира олди ва секин-аста “Верона”га тенглашиб олди. Бироқ, иккинчи бўлим ўрталарида ҳимоячиларнинг сусткашлиги оқибатида Марко Фараоненинг зарбаси яна Перин дарвозасидан жой олди.
Лекин қолган дақиқаларда меҳмонларнинг хавфли ҳужумларини бартараф этган “Женоа” футболчилари мағлубиятдан қутилиб қолиш учун босимни кучайтирди. Бу сўнгги дақиқаларга келиб, ўз фойдасини берди. Хорватиялик легионер Милан Бадель узоқ масофадан аниқ зарба йўллади. Бу вазиятда дарвозага яқин турган Элдор ҳимоячиларни чалғитиб, тўп йўлини очиб берди.
Умуман олганда, шу куни Шомуродов ўз одатига кўра, рақибдан тўпни олиб қўйиш, уларнинг ҳужумини тўхтатиш, иккинчи қаватдаги курашларда фаол иштирок этди. У ўз жамоаси таркибида энг яхши икки футболчидан бири бўлди.
Шу ўринда, Шомуродов фаолиятида “қора аъананага” барҳам берилганини ҳам таъкидлаш жоиз. Гап шундаги, кетма-кет бешта учрашувдан буён Элдор гол урган ўйинларда жамоаси 1:2 ҳисобида ютқазмоқда.
Бу 2019 йили Ўзбекистон миллий терма жамоасининг Осиё кубогида Японияга қарши ўйинидан бошланган. Ўшанда Элдор ҳисобни очганига қарамай, японияликлар кейинчалик иккита гол уриб, ғалабани илиб кетганди. Шунингдек, ўтган йили Тошкентда Эрон билан бўлган баҳсда ҳам Шомуродов гол урган бўлса-да, 2:1 ҳисобидаги ғалаба меҳмонларга насиб қилди.
Ўтган йили “Ростов”нинг Европа лигаси доирасида Исроилнинг “Маккаби Хайфа” жамоасига қарши баҳсида ўзбек ҳужумчиси биринчи бўлиб тўп киритганди. Лекин исроилликлар иккита гол уриб, кейинги босқичга чиқди.
Элдорнинг бу “қора анъанаси” Италияда ҳам давом этди. А Серия доирасида легионеримизнинг “Парма” ва “Сассуоло” дарвозасига йўллаган тўпи жамоасини мағлубиятдан қутқариб қолмади ва ҳисоб ҳам одатдагидек 1:2 кўринишига келди.
Ниҳоят, “Верона”га қарши ўйинда бу анъанага барҳам берилди. Аслида сўнгги дақиқаларгача тарих такрорланаётган эди. Лекин Милан Баделнинг аниқ зарбаси ҳаммасини ўзгартириб юборди.
Энди “Женоа”ни олдинда жиддий учрашувлар кутиб турибди. Генуяликлар навбатдаги учрашувни 28 февраль куни Милан шаҳрида “Интер”га қарши ўтказади.
Фикрлар