Шомуродов жамоада қолиши керак! - "Рома" мухлислари легионеримизни қўллаб-қувватламоқда

А Сериянинг 22-туридан ўрин олган "Удинезе" - "Рома" баҳси якунига етди. Мазкур беллашувда римликлар 1:2 ҳисобидаги ғалабани қўлга киритди. 

Дастлаб, 38-дақиқада мезбонлар футболчиси Лукка ҳисобни очган бўлса, 50-64-дақиқаларда "Рома" пенальтилардан Пеллегрини ва Довбик унумли фойдаланган ҳолда ғалабани илиб кетди.

Беллашувдан сўнг, "Рома"нинг Instagram саҳифасидаги "Удинезе" мағлуб этилгани ҳақидаги натижа постининг изоҳларида клубнинг кўплаб мухлислари Шомуродовни қўллаб-қувватлашмоқда.

Мухлислар футболчининг бугунги баҳсни бутунлай ўзгартириб юборгани ва жамоанинг ғалабаси учун асосий сабабчилардан бири эканлиги ҳақида ёзишмоқда. 

Изоҳларда мухлислар: 

• "Бугун майдонда 11 та Шомуродов бўлганида эди. У ўйинни ўзгартирди..."
   
• "Ишонаманки Шомуродов мавсум якунига қадар жамоада қолади. У қийин вазиятларда катта саҳнага чиқа олади"
   
• "Шомуродов майдондаги энг яхши футболчи бўлди"

- дея ўз фикрларини қолдиришмоқда.

Маълумот учун, аввалроқ Элдор Шомуродовнинг "Рома"ни тарк этиши ва "Венеция" клубига қўшилиши ҳақида хабарлар тарқалган эди