Shomurodov meni hayratga soldi!
O‘zbekiston doimo iste’dodlarga boy bo‘lgan. Xususan, futbolda ham shunday. Har bir davrning muxlislar qalbidan joy olgan, mutaxassislar e’tirofiga sazovor bo‘lgan yulduzlari bo‘ladi. Vladimir Fyodorov, Mixail An, Birodar Abduraimov, Mirjalol Qosimov, Igor Shkvirin, Azamat Abduraimov, Maksim Shatskix, Server Jeparov, Odil Ahmedov ana shunday yorqin o‘yinchilar jumlasidandir.
Hozirgi paytda o‘zbek futbolining eng porloq yulduzi sifatida haqli ravishda Eldor Shomurodov e’tirof etilmoqda.
Ayniqsa, hamyurtimiz Rossiya futbolida uch yillik muvaffaqiyatli faoliyatidan so‘ng, Evropaning eng kuchli besh chempionati orasida murakkabligi bilan ajralib turuvchi A Seriya vakili “Jenoa”ga o‘tganidan keyin Eldorga muxlislik qiladiganlar soni ko‘payib ketdi. Bugungi kunda o‘zbek futbolchisining “ko‘hna qit’a”dagi o‘yinlarini O‘zbekistondan tashqari Mustaqil Davlatlar Hamdo‘stligi doirasidagi qator mamlakatlardagi futbol ishqibozlari ham sinchkovlik bilan kuzatib bormoqda.
To‘g‘ri, Eldor Shomurodov Italiyaning eng qadimgi klubida bir tekis, barqaror o‘yin namoyish qilyapti, deyishdan yiroqmiz. Zo‘r o‘ynagan kunlari ham, o‘zini ko‘rsata olmagan paytlar ham bo‘lmoqda. Jahon futbolida begona chempionatga ko‘chib o‘tgan futbolchining debyut mavsumda barqarorlik namoyish eta olmasligi odatiy hol hisoblanadi va bunga etarlicha misollar keltirish mumkin. Hatto jahon futboli yulduzlari ham bunday vaziyatlardan o‘tgani barchamizga ma’lum.
Shu bilan birga, Shomurodov Italiya futbolida “yo‘qolib” qolmaganini ham ta’kidlash lozim.
Shomurodovning o‘zi voyaga etgan mamlakatdan minglab kilometr yiroqda joylashgan Italiyadan qo‘nim topib, Evropa futboliga kirib borgani ko‘plab yoshlar uchun o‘rnak bo‘lmoqda. Bugungi kunda Eldor nafaqat o‘zbekistonlik, balki rossiyalik yosh futbolchilarning ham kumiri hisoblanadi. Ana shunday futbolchilardan biri “Rostov” klubi tarbiyalanuvchisi Igor Volkovdir.
Igor futbolda o‘z o‘rnini topishga harakat qilmoqda va bunda Shomurodovni o‘ziga o‘rnak, deb biladi. Bu hujumchi 14 yoshida Rostovdagi olimpiya zaxiralari o‘quv-yurtiga kirgan va shu erda o‘zini ko‘rsatib, “Rostov”ning o‘rinbosarlar jamoasiga jalb qilingan.
- O‘rinbosarlar tarkibi safar uchrashuvlariga asosiy jamoa bilan birga bitta samolyotda uchardi. Safar chog‘ida o‘zimiz havas qilgan yulduzlarning maydondan tashqarida o‘zini qanday tutishi, kiyim almashtirish xonasidagi jarayonlar va mashg‘ulotlardagi xatti-harakatlarini bevosita kuzatishdan baxtiyor bo‘lardik. Bu bizga juda katta tajriba edi.
Men Eldor Shomurodovdan hayratlanardim. U hammaga o‘z imkoniyatidan qanday qilib oqilona foydalanish kerakligini amalda ko‘rsatib bergan futbolchidir. O‘zbekistondan kelgan edi, Rossiyada futbolchi sifatida yuqori salohiyatga ega ekanini ko‘rsata oldi va Italiyaga taklif qilindi. Hozir esa “Jenoa”ning asosiy futbolchilaridan biri sifatida to‘p tepmoqda. Shomurodov futbolda o‘z o‘rnini topish usulini yaqqol ko‘rsatib berdi, - deydi Igor Volkov.
21 yoshli Igor Volkov Sevastopolning “Dinamo” jamoasi sharafini himoya qilmoqda. Eldor Shomurodov singari hujumda o‘ynaydigan Igor hamyurtimiz ortidan borib, o‘z salohiyatini va iqtidorini to‘liq ochishni, kuchli jamoalarda to‘p tepishni, to‘purar sifatida tanilishni orzu qiladi.
Nima ham derdik, hamyurtimizga xorijlik futbolchilarning havas qilayotgani yoqimli, albatta. Ishonamizki, Igor Volkovdan tashqari ham Eldor Shomurodovni o‘zining kumiri, deb biladigan futbolchilar soni juda ko‘p. Xususan, yurtimizda ham Eldor kabi Evropa futbolini zabt etishni maqsad qilgan va bu yo‘lda harakatini boshlagan yoshlar ham etarlicha topiladi. Ularga ham Eldorning yo‘lini bersin!
Fikrlar