Murabbiy yaxshi ko‘rgan shogirdi Shomurodovni Angliyaga chaqiradimi?
Valeriy Karpin Eldor Shomurodovning Rossiyadagi faoliyatida muhim o‘rin tutadi. Birinchi navbatda, bu mutaxassis legionerimizga ishonch bildirishdan qo‘rqmadi va uning hech kim payqamagani qobiliyatlarini ochishga erishdi.
Yurtimizda “Mash’al” va “Bunyodkor” jamoalarida to‘p tepib, 2017 yilda “Rostov”ga yo‘l olgan Eldor Shomurodovning Rossiya futbolida o‘rnini topishi oson bo‘lgani yo‘q. Rostovliklarning o‘sha paytdagi bosh murabbiyi Leonid Kuchuk futbolchimizga u qadar ishonch bildirmadi va etarli o‘yin amaliyoti bermadi. Oradan ko‘p o‘tmay, Valeriy Karpin “Rostov”ni qabul qilib oldi va vaziyat o‘zgardi.
Rossiyalik mutaxassis legionerimizni markaziy hujumga qo‘ya boshladi va o‘zini ko‘rsatishi uchun etarli vaqt berdi. Bungacha Eldor tezkorligi, driblingi va pas oshirish mahorati evaziga qanot hujumchisi sifatida o‘zini ko‘rsatib kelayotgan edi.
Karpinning ishonchiga javoban, Shomurodov ham sekin-asta asosiy tarkib o‘yinchisiga aylandi va bora-bora jamoaning asosiy yulduzi darajasiga ko‘tarildi. O‘zbekistonlik futbolchi “Rostov”da o‘ynagan kezlari chempionatda 80 ta o‘yin o‘tkazib, raqiblar darvozasini 16 marotaba ishg‘ol qilishga muvaffaq bo‘ldi.
Bosh murabbiy o‘zbek futbolchisining imkoniyatlarini yuqori baholab, Aleksey Miranchuk va Serdar Azmun qatorida Shomurodov ham liganing eng zo‘r futbolchisi ekanini ta’kidladi.
- Men uchun Shomurodovning narxi 50 million evroga teng. U bir mavsumda 20 ta gol urish uchun barcha xususiyatlarga ega. U kuchayib boradi, - degan edi Valeriy Karpin.
Shuningdek, “Rostov”ning aossiy to‘purariga aylanib borayotgan Eldorga Rossiyadan aniq takliflar bo‘ldi. Karpin uni raqobatchi klublarga qo‘yib yubormadi. Vaziyat etilishini kutdi. Keyin “Jenoa”ga ketishiga qarshilik qilmay, Evropaga yo‘l ochib berdi. Genuyaliklar o‘zbek legioneri uchun rostovliklarga 7,5 million evro to‘ladi, 1,5 million evro bonus ajratdi va keyingi transferdan 15 foiz ulush beradigan bo‘ldi.
Shomurodovning o‘zi Karpin qo‘l ostida taktik va jismoniy tayyorgarlik bo‘yicha o‘sishga erishgani, himoyada qanday samarali o‘ynashni o‘rganganini aytgan edi. Shomurodov “Rostov”da hujumdagi ustunliklarini rivojlantirish qatorida to‘psiz harakat qilish, ortga qaytib, himoyada o‘ynash, jamoadoshlarini qo‘llab-quvvatlash, golli vaziyatlar yaratish usullarini ham o‘zlashtirdi.
Biroz oldinga o‘tib, aytish mumkinki, ayni paytda “Jenoa” muxlislari va murabbiylarga ham Shomurodovning mana shu xususiyatlari juda ma’qul kelmoqda.
Valeriy Karpin bosh murabbiy sifatida qanday mahoratga ega ekanini “Rostov” natijalaridan bilib olish mumkin. O‘z davrida Rossiya va Evropa jamoalarida o‘ynab, katta tajriba to‘plagan bu mutaxassis “Rostov”dan har yili bir necha etakchilar ketishiga qaramay, jamoasini yuqori o‘rinlar uchun da’vogarga aylantirishni uddalayapti.
“Rostov” bilan 2024 yilning yarmigacha shartnomaga ega bo‘lgan Valeriy Karpin rossiyalik jurnalistlarga yaqin kelajakda Angliya yoki AQShda murabbiylik qilish rejasi borligini ma’lum qildi. Va buning uchun kerak bo‘lsa, ingiz tilini ham o‘rganib olishga tayyor. Nima deb o‘ylaysiz, Valeriy Karpinning rejasi amalga oshib, Angliya jamoalaridan biriga bosh murabbiy bo‘lsa, ishongan shogirdi Eldor Shomurodovni yordamga chaqirarmikin?
Fikrlar