Шомуродов Роналду билан ёнма-ён тўп тепиши мумкин! Бунинг учун эса...
Европа матбуоти, хусусан, Англиянинг The Sun нашри Криштиану Роналду А Серияга қайтиши мумкинлиги ҳақида бонг урмоқда. Маълумки, португалиялик юлдуз ўтган йили август ойида “Ювентус”дан “Манчестер Юнайтед”га кўчиб ўтганди.
Очиғини айтганда, Роналдуга собиқ жамоасининг ҳозирги ҳолати умуман ёқмаяпти. “Манчестер Юнайтед” у кутгандек бўлиб чиқмади.
Доимо юқори мақсадлар сари интилишга кўникиб қолган футболчи жамоадошларининг рақобатбардош эмаслигидан, бош мураббий Ральф Рангник қўллаётган иш услуби унга маъқул келмаётганидан нолимоқда.
Қолаверса, маҳаллий ўйинчилар Роналдунинг кийим алмаштириш хонасида лидерлик қилишига йўл қўймаяпти. Энг кутилмаган ҳолат эса, “Манчестер Юнайтед” чемпионатда совринлар учун эмас, Чемпионлар лигасига сўнгги йўлланмани берадиган тўртинчи ўрин учун курашаётганидир.
Роналдунинг агенти Жорже Мендеш жамоа мавсум охирида Чемпионлар лигасига чиқа олмаса, мижозига бошқа клубга ўтиши ҳақида клуб раҳбарларини огоҳлантирган.
Табиийки, Роналду даражасидаги юлдуз ишсиз қолмайди. Унинг футболкалари сотувидан келадиган маблағнинг ўзи ҳам трансфер харажатларини ортиғи билан қоплайди. Шу боис 37 ёшли тўпурарнинг бозори ҳамон чаққон.
The Sun журналистлари туғма тўпурарга ҳозирнинг ўзида учта жамоадан жиддий таклифлар борлигини ёзмоқда. Хусусан, ПСЖ, “Бавария” ва “Рома” уни ўз сафига қўшиб олмоқчи. Бу учлик орасида ҳар бирининг ўзига хос устунлиги бор.
Париж клуби ҳужум чизиғида Лионель Месси ва Криштиану Роналду тандемини ҳосил қилиш учун маблағни аямайди. Қолаверса, парижликларнинг ўз тарихида илк бор Чемпионлар лигасини ютиш орзуси Роналдуники билан муштарак. Ёзда жамоани Зинедин Зидан қабул қилиб олиши ҳақидаги гап сўзлар португалиялик ўйинчида қадрдон устози билан ишлаш умидини уйғотиши эҳтимолдан холи эмас.
“Бавария” футболчиларни катта маош билан эркалатмайди. Бироқ, бу клуб Чемпионлар лигасини қўлга киритиш имконияти ва эҳтимоли юқорилиги Криштианунинг танловига таъсир қилиши шубҳасиз. Бугунги кунда Роналдунинг ягона орзуси яна Чемпионлар лигаси бош совринини боши узра кўтаришдан иборат.
Ғалати кўринса-да, “Рома”нинг устунлиги Жозе Моуриньо. Португалиялик мутахассис ўз ҳамюртини кўндириши мумкин. Мутахассислар Моуриньо “Реал”да ишлаганида Криштиану Роналду билан муносабати бузилганини эсга олди. Бироқ тажрибали мураббий жамоани кучайтириш ва ўз олдига қўйилган талабни бажариш йўлида юлдуз ҳамюрти билан ҳамкорлик қилишга, унга таркибдан муқим жой беришга тайёрлиги таъкидланмоқда.
Бироқ, “Рома” олдидаги энг катта тўсиқ, жамоанинг мусобақа жадвалидаги ўрнидир. Роналдунинг эътиборини қозониш учун римликлар жорий мавсумнинг ўзида Чемпионлар лигаси йўлланмасини нақд қилиши ҳам талаб этилади. Роналдудек юлдуз Европа лигаси ёки Конференциялар лигасида тўп тепадиган даражага тушгани йўқ.
Агар Роналду тақдир тақозоси билан Римга келиб қолса, Элдор Шомуродовнинг “Рома” сафида майдонга тушиши янада қийинлашиб қолади. Элдор ҳозир учинчи ҳужумчи даражасига тушиб қолди. Моуриньо асосий тўпурар вазифасини Тэмми Абрахамга юклаган. Иккинчи ҳужумчи сифатида Жозенинг эътиборига тушган Феликс Афена-Гьянга кўпроқ ишонч билдиряпти. Шомуродов баъзан бир неча дақиқага майдонда кўриниш бермяпти, айрим учрашувларда эса умуман захирада қолиб кетмоқда.
Яна бир эътиборга молик жиҳат, Элдор Шомуродов ва Криштиану Роналдунинг майдондаги амплуаси бир хиллигидир. Иккаласи ҳам марказий ҳужумчи, лекин кўпинча чап қанотда, керак бўлса, ўнг тараф ҳужумида ҳам ўйнай олади.
.jpg?1645031141127)
Роналду атрофидаги вазият ҳали ўз ечимини топиши қийин. Португалиялик юлдуз Манчестердан кетишга шошилмаяпти. Ральф Рангник шогирдларида ҳамон Чемпионлар лигаси йўлланмасини қўлга киритиш имкони юқори.
Фикрлар