Шомуродов ва Абрахамдан кейин Дибала ҳам “Рома”дан кетадиган бўляпти!

“Рома”нинг жорий мавсумга қўйган асосий мақсадларидан бири Чемпионлар лигасига йўлланма олиш.

Лекин жамоанинг А Серияда ишлари юришмаяпти. Кетма-кет очко йўқотаётган жамоа танаффусга еттинчи ўринда чиқиб кетди.

Италия матбуоти жамоанинг асосий юлдузи Пауло Дибала ҳам ёзда жамоани тарк этиши мумкинлигини ёзмоқда.

La Gazzetta dello Sport нашрининг таъкидлашича, агар “Рома” Чемпионлар лигасига йўлланмани қўлга кирита олмаса, аргентиналик юлдузни ўз сафида ушлаб қола олмайди. Чунки дибаланинг шартномасида римликлар Европанинг энг нуфузли турнирига чиқишни уддалай олмаса, футболчини 20 миллион евро эвазига қўйиб юбориш мажбуриятини белгилаб қўйилган.

Табиийки, Пауло Дибала даражасидаги юлдузни 20 миллион еврога харид қилиш гранд клублар учун айни муддао ва ҳеч қандай муаммо эмас.

30 ёшли аргентиналик ҳужумчи ўтган ёзда “Ювентус” билан шартномаси тугаганидан кейин эркин агент сифатида пойтахт “бўрилари” сафига қўшилди. Моҳир ҳужумчи римликлар билан 2025 йилнинг ёзигача битим тузган. Бироқ ҳамкорлик давом этиши учун “рома” мунтазам Чемпионлар лигасида иштирок этиши талаб қилинади.

Пауло Дибала жорий мавсумда барча турнирларда 12 маротаба майдонга тушиб, еттита гол ва бир жуфт ассист муаллифи бўлди.

Бош мураббий Жозе Моуриньо аргентиналик футболчининг жамоадаги аҳамияти ва ўрнини жуда юқори  баҳоламоқда. Дибала майдонга тушган ўйинларда римликлар рақибдан устунлик қилмоқда, олдинги чизиқда голли вазиятлар кўп яратиляпти.

Айни пайтда Пауло Дибала жароҳатидан қутилиб, формасини тиклашга ҳаракат қилмоқда. У Аргентина терма жамоаси сафида Қатарда бўладиган жаҳон чемпионатида иштирок этишга тайёргарлик кўряпти.

Аввалроқ, “Рома” ҳужум чизиғида катта ўзгаришлар бўлиши кутилаётгани ҳақида хабарлар тарқатилган эди. Жозе Моуриньо ўтган мавсум тўпурари Тэмми Абрахамнинг жорий чемпионатдаги ҳаракатларидан умуман қониқмаяпти.

Клуб раҳбарияти “Челси”дан олиб келинган ўйинчини январда 45-50 миллион еврога сотиб юборишни режалаштирмоқда.

Бундан ташқари, “Рома” ҳужумчиларидан Элдор Шомуродов ҳам қишки трансферлар вақтида ўзига янги жамоа қидириши кераклиги таъкидланмоқда. Клуб спорт директори Тьягу Пинто ўзбек ҳужумчиси ҳеч бир жамоага ижарага жўнатилмаслиги, харидор чиқсу унинг трансфер ҳуқуқини тўлиқ сотиб олиши шартлиги ҳақида маълумот берди.

Демак, яқинлашиб келаётган қишки трансфер бозори ва мавсум якунида “Рома” ҳужум чизиғи жиддий ўзгаришларга дуч келиши кутилмоқда.

Қатарда бўладиган жаҳон чемпионати муносабати билан таътилган чиққан жамоалар А Сериянинг навбатдаги турини 2023 йилнинг 4 январида ўтказади. “Рома” футболчилари келаси йилнинг дастлабки учрашувида “Олимпико” аренасида “Болонья” вакилларини қабул қилади.

Шомуродов “Атлетико”га ёрдам кўрсатди! (фото)

Ўзбекистон ютадими ёки Қозоғистон? Футболчилар баҳс бойлади!