Шомуродов ва Файзуллаев “Башакшеҳир”ни Европага олиб чиқиши мумкин! Бунинг учун фақат битта шарт бор

Туркия Суперлигасининг сўнгги 34-тур учрашувлари ўтказилмоқда. “Истанбул Башакшеҳир” мавсумдаги охирги ўйинни сафарда “Газиантеп”га қарши ўтказиб, 2:1 ҳисобида ғалаба қозонди. Беллашувда Элдор Шомуродов гол урган бўлса, Аббосбек Файзуллаев ассист амалга оширди.

Ғалабадан сўнг Нури Шаҳин шогирдларининг очколари сони 57 тага етди ва жамоа 5-ўринни эгаллади. Ушбу ўринни эгаллаган клуб келаси мавсум Конференциялар лигасида иштирок этиши мумкин.

Агар Туркия кубоги финалида “Трабзонспор” “Коняспор”ни мағлуб этса, истанбулликлар еврокубоклар йўлланмасини қўлга киритади. Сабаби чемпионатда кучли тўртликка кирган жамоа Туркия кубогини ҳам ютса, яна битта йўлланма лига орқали тақдим этилади. Шу тариқа, 5-поғонани эгаллаган жамоа Конференциялар лигасида қатнашади.

Маълумот учун, “Трабзонспор” 69 очко жамғариб, турнир жадвалида 3-ўринда бормоқда.