Shomurodov va Husanovda nima gap?
Evropaning kuchli beshlik chempionatlarida hozircha o‘zbekistonlik ikki futbolchi to‘p tepmoqda.
28 yoshli hujumchi Eldor Shomurodov to‘rt yildan beri Italiya A Seriyasida katta tajriba to‘plab ulgardi.
20 yoshli Abduqodir Husanov esa, Frantsiyadagi birinchi o‘zbek futbolchisi sifatida tarixga o‘z nomini muhrladi.
“Top-5” ligalardagi har ikki legionerimiz uchun mavsumni ijobiy baholashimiz mumkin.
Sports.uz portali Eldor Shomurodov va Abduqodir Husanovning yakunlangan mavsumdagi statistikasiga e’tibor qaratdi.
Eldor Shomurodov
“Kalyari” yakunlangan mavsumda A Seriyadagi joyini saqlab qoldi. Bunda Sardiniya klubiga mahalliy futbolchilardan tashqari, dunyoning 13 mamlakatidan kelgan 13 nafar legioner yordam berdi.
Tarkibdagi eng qimmatbaho va katta maosh oladigan o‘yinchilardan hisoblangan Eldor Shomurodov chempionatning ikkinchi qismida katta sahnaga chiqdi.
Tajribali forvard eng muhim pallada jamoaning asosiy hujumchisiga aylana oldi va gollari hamda assistlari bilan “Kalyari”ga foyda keltirdi.
Eldor A Seriyada 22 ta uchrashuvda ishtirok etib, raqiblar darvozasini uch marotaba ishg‘ol qildi va jamoadoshlariga uchta golli pas uzatdi. Shuningdek, hamyurtimiz Italiya kubogida ikkita bahsda qatnashdi. Umumiy hisobda Eldor 1044 daqiqa maydonda harakat qildi.
Hozircha, Shomurodov kelasi mavsumni qaysi jamoada boshlashi mavhum bo‘lib turibdi. “Kalyari” o‘zbek legionerini to‘liq transfer qilish borasida bir qarorga kelgani yo‘q. Shartnomaga egalik qiluvchi “Roma” rahbariyati esa, yangi loyihani amalga oshirmoqda va unda Eldor Shomurodovga joy ajratish ko‘zda tutilmagan.
Abduqodir Husanov
O‘tgan yili yozda Abduqodir Husanovning Belarus chempionatidan Frantsiya vitse-chempioni “Lans”ga ko‘chib o‘tgani katta sensatsiya bo‘lgandi.
O‘shanda 19 yosh bo‘lgan futbolchimiz o‘zbekistonlik charm to‘p ustalari har qanday chempionatda o‘ynay olishini isbotlab qo‘ydi.
Frantsiya chempionatida mahalliy o‘yinchilardan legionerlar ko‘p. Yakunlangan mavsumda 20 ta jamoa 466 nafar futbolchini qaydnomadan o‘tkazgan bo‘lsa, shulardan 59,2 foizi, ya’ni 276 nafari xorij mamlakatlaridan kelgan legionerlardir.
“Lans” tarkibining yarmidan ko‘pi, ya’ni 27 nafar futbolchidan 14 tasi chet ellik charm to‘p ustalaridir.
Osiyoning yagona vakili bo‘lgan markaziy himoyachimiz “Top-5” tarkibiga kiruvchi Liga 1 musobaqasida yo‘qolib qolgani yo‘q. Bosh murabbiy Frank Xeyz uni asosan “Lans”ning asosiy himoyachilari safdan chiqqanida maydonga tushirdi.
Husanov Liga 1 tur o‘yinlarida 11 marotaba maydonga tushdi va jami 811 daqiqa o‘ynadi.
Abduqodir UEFAning ikki nufuzli musobaqasi – Evropa Chempionlar ligasi va Evropa Ligasida ikkitadan o‘yin o‘tkazib, ushbu yuqori darajali turnirlarda ham debyutini nishonladi.
Orada Abduqodir “Lans”ning yoshlar jamoasida ham bitta o‘yin o‘tkazib keldi. Umumiy hisobda lansliklar uchun 16 ta bahsda maydonga tushib, jami 1051 daqiqa harakat qildi.
20 yoshli himoyachi kelasi mavsum “Lans”ning asosiy tarkibiga kirish uchun kurashadi.
Fikrlar