Шомуродовда ўзини кўрсатиш учун яна учта имкон бор

“Рома” бош мураббийи Жозе Моуриньо футболчиларга икки ҳафталик таътил берди. Шундан сўнг, жамоа Римда йиғилиб, якуний ўқув-машғулот йиғини ўташ учун Португалияга йўл олади.

Португалиянинг Алгавре шаҳридаги базада “Рома” футболчилари техник, тактик, жисмоний тайёргарлик машғулотларидан ташқари, ўйин амалиётини яхшилаш учун учта ўртоқлик учрашувида майдонга тушади.

Бу беллашувларда футболчилар Жозе Моуриньо бошчилигидаги мураббийлар штаби вакилларига расмий учрашувларга тайёр эканликларини намойиш қилиб беришлари талаб қилинади.

“Рома” биринчи бўлиб, 16 декабрь куни Испания чемпионати вакили “Кадис” футболчилари билан куч синашади.

Иккинчи ўртоқлик баҳси Португалиянинг маҳаллий “Каса Пиа” жамоасига қарши ўтказилади.

Бир ҳафталик йиғиннинг охирги ўртоқлик учрашуви мавсумнинг иккинчи қисмига Португалияда ҳозирлик кўраётган Нидерландиянинг “Ваалвейк” клубига қарши ташкил этилади.

Элдор Шомуродов январда жамоасини ўзгартирмоқчилигини инобатга олсак, Португалиядаги учрашувлар легионеримиз учун “Рома”га кераклигини исботлаш учун сўнгги имконият ҳисобланади.