Шомуродовга жой йўқми?

Элдор Шомуродовнинг жамоаси – “Специя”ни А Сериянинг 25-турида ўта муҳим учрашув кутиб турибди.

Лигурияликлар жорий мавсум юқори дивизиондаги жойини сақлаб қолиш учун курашишга мажбур. Ҳозирча, жамоа 20 очко билан 17-поғонада қайд этилган. Хавфли ҳудудда жойлашган “Верона” билан лигурияликларни атиги уч очко ажратиб турибди.

Бўлажак баҳс олти очко учун бўлади. “Специя” ғалаба қозонган тақдирда тўғридан тўғри рақобатчиси ҳисобланган вероналиклар билан фарқни олтитага етказиб олади. “Верона” зафар қучса, мезбонларнинг аҳволи анча оғирлашади.

Аслида “Верона” аъанавий тарзда “Специя”дан кучли ҳисобланади. Бу жамоалар Италиянинг учта дивизионида ва мамлакат кубогида жами 22 маротаба ўзаро тўқнаш келган. С Сериядаги иккита баҳсда жамоалар ҳисобида биттадан ғалаба бор. В Серияда кузатилган саккизда ўйиннинг тенг ярмида “Верона”нинг қўли баланд келган. Икки марта ғолиб аниқланмаган ва бир жуфт беллашув “Специя” фойдасига ҳал бўлган.

А Серияда улар 11 маротаба рўбарў келди. Дастлабки ўнта учрашувда “Верона” еттита ғалаба ва учта дуранг қайд этди. Лекин жорий мавсумнинг  биринчи даврасида “Специя” рақиб майдонидан 1:2 ҳисобидаги ғалаба билан қайтди. Мбала Нзоланинг дубли Лигурия клубига юқори дивизионда “Верона”дан илк бор уч очко олишини таъминлади.

Айни пайтда Италия матбуоти ҳар икки жамоа бош мураббийлари муҳим баҳсда қайси футболчиларни асосий таркибда майдонга туширишини таҳлил қилмоқда. Ҳозирча, бирор манба Элдор Шомуродовни бошланғич таркибга киритгани йўқ.

Легионеримиз худди “Рома”да бўлгани каби захира футболчисига айланиб қоладиганга ўхшайди. Элдорни “Специя”га олиб келган Лука Готти истеъфога чиқарилганидан кейин унинг ўрнини эгаллаган Леонардо Семпличи илк баҳсдаёқ ҳужумчимизни заҳирага ўтқазиб қўйди.

Манбаларнинг таъкидлашича, Семпличи “Верона”га қарши баҳсда жароҳат туфайли сафдан чиққан дарвозабон Йерун Зут, ҳимоячилардан Эмиль Холм, Жоао Моутиньо, ярим ҳимоячилар Симоне Бастони, Шимон Журковски хизматидан фойдалана олмайди.

Нуфузли манбалардан https://www.calciomercato.com сайти экспертлари “Верона”га қарши баҳсда Семпличи қуйилаги ўйинчиларни илк дақиқадан ўйнатишини тахмин қилмоқда:

“Специя” (4-2-3-1): Драговски; Амьян, Ампаду, Николау, Реца; Бурабия, Экдаль; Верде, Агудело, Гьяси; Нзола.

Яна бир машҳур сайт https://footballnews24.it мутахассислари ҳам “Специя” мураббийлар штаби бўлажак баҳсда 4-2-3-1 схемасидан фойдаланишига ишонмоқда.

Бу сайт тузган тахминий таркибда ўзгариш йўқ:

“Специя” (4-2-3-1): Драговски; Амьян, Ампаду, Николау, Реца; Экдаль, Бурабия; Верде, Агудело, Гьяси; Нзола.

“Специя” ва “Верона” ўртасидаги баҳс 5 март куни Тошкент вақти билан 16:30 да бошланади.

Икки ҳужумчимиз "Топ-5"да!

Шомуродов жамоасига яхши ва ёмон хабар!

Машарипов жамоаси “Реал”га айланиб бормоқда