Шомуродовнинг сўнгги ўйинини хорижлик экспертлар қандай баҳолади?

А Сериянинг бу йилги мавсумида чемпионлик, совринли ўринлар, Европа Чемпионлар лигаси йўлланмалари, юқори дивизионда жон сақлаб қолиш учун кураш охирги тургача давом этди.

Клаудио Раньери қўл остида мавсумнинг энг яхши жамоасига айланган “Рома” қуйи  поғоналардан кўтарилиб, Европа Чемпионлар лигаси йўлланмасига даъвогарлик қилди. Бу мақсадга эришиш учун “бўрилар”га бир очко камлик қилди.

Жамоа 38-турда Туринда “Торино”ни 2:0 ҳисобида мағлубиятга учратганига қарамай, бу шаҳарнинг иккинчи жамоаси – “Ювентус”га етолмайди. Чемпионатни бешинчи ўринда якунлаган римликлар келаси мавсум қитъанинг иккинчи нуфузли турнири – Европа лигасида иштирок этади.

Қувонарли томони эса, Элдор Шомуродов мавсумни захира ўйинчиси мақомида бошлаб, “Рома”нинг асосий ҳужумчиси даражасида якунлади. “Торино”га қарши баҳсда ҳам легионеримиз бошланғич таркибда майдонга тушиб, 70 дақиқа ҳаракат қилди.

Нуфузли манбалардан бири – romaforever.it портали экспертлари “Рома” футболчиларининг “Торино” қарши баҳсдаги ҳаракатларини қуйидагича баҳолади.

СВИЛАР 6:

“Торино” римликларнинг асосий дарвозабонига ҳеч қандай муаммо туғдира олгани йўқ. Свилер навбатдаги қуруқ учрашувини расмийлаштириб қўйди.

ЧЕЛИК 6:

Туркиялик футболчи учун ҳам баҳс анча осойишта ўтди. Сенсацион ҳаракатларни амалга оширмаган бўлса-да, барқарорлик кўрсатди.

МАНЧИНИ 6:

Мавсумнинг охирига келиб, Манчини ҳақиқий жамоа сардори даражадасида ўйнади. Ҳаракатчанлиги билан жамоадошларига ўрнак бўлди.

НДИКА 6:

“Рома” жорий мавсумда уч нафар мураббийни ишлатган бўлса, уларнинг ҳар бири жамоага ўз ўйин услубини сингдирди. Шунга қарамай, Ндика мавсумдаги 38 та ўйинда иштирок этган ягона футболчи бўлди. Африкалик ўйинчи ҳимоя чизиқда тартиб ва барқарорликни таъминлаб берди.

САЛЕМАКЕРС 7,5:

Қанотдаги кутилмаган юришлари билан жамоага катта фойда келтирди. Алексис пенальти ишлаб берди ва иккинчи бўлимда ўзи ҳам гол уриб, учрашув қаҳрамони бўлди.

КРИСТАНТЕ 6:

Ҳаракатчан футболчи бу баҳсда гол урган эди. Бироқ Анжелиньонинг оффсайди туфайли у инобатга олинмади. Кристанте ортиқча ҳаракатларсиз, барқарор ўйнади.

ПАРЕДЕС 6,5:

Мавсумнинг сўнгги учрашувларида аргентиналик жаҳон чемпиони жамоа ўйинини назорат қилиб турди. Қийин паллада пенальти тепиш масъулиятини бўйнига олди.

КОНЕ 6,5:

Қатъияти ва индивиудал ҳаракатларини жамоа манфаатларига йўналтириб ўйнади. У жамоа учун муҳим ўйинчи  эканини яна бир бор кўрсатди.

АНЖЕЛИНЬО 6,5:

Анжелиньо бу гал ҳал қанотдаги рейдлари билан жамоага катта ёрдам берди. Толиқмайдиган ўйинчи дарвозага ҳам хавф солишни унутгани йўқ.

СУЛЕ 7:

Дибаланинг ўрнини эгаллаган Суле кейинги учрашувларни анча ишончли ўтказди. Айниқса, Салемакерсга узатган ассисти жуда аҳамиятли бўлди.

ШОМУРОДОВ 6,5:

Ўзбек футболчиси яна бир учрашувда жамоа учун фаол ўйнаб берди. Бошланғич таркибда майдонга тушган Шомуродов олдинги чизиқда жамоадошлари учун бир неча бор гол уришга қулай вазият яратиб берди. Бироқ бундан самара чиқара олишмади. Элдорнинг ўзи ҳам гол уришга ҳаракат қилди, бироқ самарадорлик бўйича шахсий рекордини такрорлай олмади.

Эслатиб ўтамиз, Элдор Шомуродов жорий мавсум А Серия, Италия кубоги ва Европа лигасида жами 37 та учрашувда иштирок этиб, ўз ҳисобига еттита гол ва бешта ассист расмийлаштириб қўйди.

Ҳусановнинг “Манчестер Сити”даги келажаги муҳим қарорга боғлиқ?