Шохруз Норхонов: "Яна "Бухоро"га қайтишимни билмагандим"

Яқинда хабар берганимиздек, “Бухоро” клуби ҳужумчи Шохруз Норхонов билан шартнома имзолади. Натижада у яна собиқ клубига қайтди.

2023 йили бухороликлар шарафини ҳимоя қилган футболчи ўтган йили “Нефтчи” учун тўп сурди. Бу йил яна устози Улуғбек Бақоев қўл остида ўйнайдиган бўлди. Норхонов “Бухоро”га қайтгач, фикрлари билан ўртоқлашди.

- "Бухоро"дан "Нефтчи"га ўтгандингиз ва яна "Нефтчи"дан "Бухоро"га қайтдингиз. Бир йилдан кейин шундай қайтиш ҳақида ўйлаганмисиз?

- Ассалому алайкум. Йўқ, кетаётганимда “Бухоро”га қайтишим борасида билмагандим.

- "Бухоро"га қайтгач, қандай ўзгаришларни кўряпсиз?

- Ҳозир жамоа анча ўзгарган. Клубнинг бугунги кундаги мақсадлари ҳам жуда юқори.

- Улуғбек Бақоев бошқалардан нимаси билан ажралиб туради ва унга 3 та сўз билан таъриф бера оласизми?

- Улуғбек Бақоевни ажойиб тарафлари футболчи билан яхши гаплаша олиши, футболчига ишонч бериши ва унга ўсиши учун имкон яратиб беради. Унинг бошқа мураббийлардан фарқи бир сўзлиги ҳамда футболчини тушуна олишидир.

- "Бухоро" янги мавсумда яна омадсизликка дуч келмаслиги учун нимадан эҳтиёт бўлиши керак, деб ўйлайсиз?

- Авваламбор яхши жамоа йиғиб бир оила бўлишдир. Чемпионат бошидан қўйилган мақсад сари ҳаракат қилиш керак.

- Охирги икки мавсумда голларингиз камайиб кетди. Буни нима билан боғлаган бўлардингиз?

- Ҳа, тўғри олдинги формамдан анча пасайиш бўлди. Энди бу ёғига фақат олдинга қадам ташлаш бўлади, Худо хоҳласа.

- "Бухоро"даги бу йилги таркибдан келиб чиқиб айтилса, қандай ўрин учун курашади, сизнингча?

- Таркиб яхши, номдор бўлмаса ҳам бир оила бўлиб ҳаракат қилинса мақсадимиз фақат юқори ўринлар бўлади. Бу йил “Бухоро” мухлисларига илтимосим, жамоани ҳар доим қўллаб-қувватлаб туришса биз уларни хурсанд қилиш учун боримизни бериб ўйнаймиз.

Шуҳратбек Жўраев.