Шундай зўр тўпурар бор эди! Каванини Европага қайтаришмоқчи

Италиянинг “Лечче” клуби А Сериядаги жойини сақлаб қолиш учун курашиш мақсадида таркибини кучайтиришни истамоқда. Клуб ўз режасини амалга ошириш учун уругвайлик тажрибали ҳужумчи Эдинсон Каванини Европага қайтаришга ҳаракат қиляпти.

Яқинда Кавани Аргентинанинг «Бока Хуниорс» клубини тарк этди. У сўнгги уч йилни шу жамоада ўтказди, аммо ҳозирча футболчилик фаолиятини якунлашга қарор қилмаган.

Corriere del Mezzogiorno нашри маълумотига кўра, “Лечче” раҳбарияти аллақачон Кавани атрофидаги вакиллар билан музокараларни бошлаган.

Аввалроқ Кавани Италия жанубида яшаб, “Наполи” шарафини ҳимоя қилган. Бироқ у яна Италия чемпионатига қайтиб, бу сафар анча камтарона мақсадларга эга жамоада ўйнашга рози бўладими-йўқми, ҳозирча номаълум.

Фаолияти давомида Кавани “Пари Сен-Жермен” ва “Манчестер Юнайтед” клубларида ҳам тўп сурган.