Симеоне: Альваресни мухлисларга яқинлаштириб бўлмайди

«Атлетико» бош мураббийи Диего Симеоне Ла Лиганинг иккинчи турида «Вильярреал»га қарши ўйин (2:2)дан сўнг ҳужумчи Хулиан Альварес билан боғлиқ вазиятга изоҳ берди.

Учрашув якунида 26 ёшли аргентиналик жамоадошлари каби мухлислар олдига бормади, балки тўғри майдонни тарк этиб, кийим алмаштириш хонасига йўл олди.

«Клуб менга у трибуналар ва мухлисларга яқинлашмаслиги ҳақида қарор қабул қилинганини айтди. Клуб уни мухлислардан узоқроққа олиб кетишни ва дарҳол кийиниш хонасига йўналтиришни маъқул топди», — деди Симеоне.

Мураббий Альвареснинг руҳий ҳолатига оид саволларга батафсил жавоб беришдан тийилди, аммо жамоани бирдамликни сақлашга чақирди.

«Мен Хулиан ҳақидаги ҳар бир саволга жавоб бермайман. Ўйлайманки, фикримни етарлича аниқ айтдим: биз бирга бўлишимиз керак. Қачонки бир бутун жамоа бўлганмиз, жиддий ютуқларга даъво қила олганмиз. Бизга ҳужумчилар керак. Бизда улар бор ва уларни асрашимиз лозим», — дея таъкидлади мутахассис. Унинг сўзларини AS нашри келтиради.

Альварес «Вильярреал»га қарши баҳснинг иккинчи бўлимида майдонга туширилди. Аввалроқ аргентиналик футболчининг «Атлетико»ни тарк этиш истаги борлиги ҳақида хабарлар тарқалган эди.