"Сити" - "Челси": Ҳусановнинг асосий таркибда майдонга тушиши учун сабаблар етарлича (Превью)

Эртага АПЛ доирасида "Манчестер Сити" ўз майдонида "Челси"ни қабул қилади. Ушбу беллашув катта афишаси билан биргаликда АПЛда кучли тўртликка кириш учун кураш бўлаётгани билан ҳам аҳамиятлидир. 

Айни вақтда "шаҳарликлар" АПЛ турнир жадвалида 38 очко билан 5-ўринни банд этиб турибди. Улардан бир поғона юқорида айнан 40 очкоси бор "аристократлар" бормоқда. Ушбу клублар ўртасидаги биринчи даврада бўлиб ўтган баҳсда Пеп Гвардиола шогирдлари Эрлинг Холанд ҳамда Матео Ковачич томонидан киритилган голлар эвазига зафар қучганди. Ўша пайтда "Сити"да ҳаммаси жойида эди ва фаворити аниқ баҳсда айнан фаворитлар зафар қучганди. Бироқ айни дам вазият бутунлай ўзгача. 

Жамоаларнинг ҳолати ҳақида: 

"Манчестер Сити" 

"Манчестер Сити" ўзи учун қийин даврни бошдан кечирмоқда. Жамоа Премьер-лигада ишончли ўйин кўрсатишни бошлади, аммо унгача 13 учрашувнинг атиги 1 тасида ғалаба қозониб, "Сити"га умуман ярашмайдиган кўрсаткичлар қайд этиб келаётганди. Бундан ташқари, Манчестер клубининг халқаро майдондаги ишлари ҳам у қадар яхши эмас. Гвардиола шогирдлари ҳафта ўртасида бўлиб ўтган ЕЧЛ ўйинида ПСЖга 4:2 ҳисобида мағлуб бўлди. Айни вақтда "Сити" ЕЧЛ турнир жадвалида 7 турдан сўнг 8 очко билан 25-ўринни банд этиб турибди. Турнирнинг асосий фаворитларидан бирининг гуруҳ босқичидаёқ мусобақани тарк этиши эҳтимоли бор. Сўнгги турда улар ғалаба қозона олмаса, кейинги босқич йўлланмасидан маҳрум бўлишади.



"Челси" 

"Челси" охирги мавсумларда кўп ва қиммат трансферларга қўл уриб, натижалар нуқтаи-назаридан танқидларга учраб келаётганди. Бироқ Лондон гранди жорий мавсумда танқидларга етарлича жавоб қайтара олмоқда. Клуб Европа Конференциялар лигасида юз фоизлик натижа кўрсатди. АПЛда эса айни вақтда тўртинчи ўринда (сўнгги мавсумлардаги қониқарсиз натижалардан сўнг улар учун бу ижобий кўрсаткич, деса бўлади). Шундай бўлса-да, Энцо Мареска шогирдлари "Boxing day" ва ундан кейинги учрашувларда муваффақиятсизликка учради. Жумладан, жамоа охирги 6 та учрашувнинг фақат биттасида зафар қучди (22-турда "Вулверхэмптон"га қарши). Унгача жамоа "Эвертон", "Кристал Пэлас" ҳамда "Борнмут"га қарши учрашувларда дуранг натижа қайд этди, "Фулхэм" ва "Ипсвич"га эса мағлуб бўлди. 



Жароҳатлар

"Манчестер Сити" 

"Манчестер Сити" ҳимоясида жароҳат билан боғлиқ муаммолар етарлича. Жумладан, Натан Аке Парижга бормаган, Рубен Диаш эса ПСЖга қарши беллашувнинг биринчи таймидан сўнг ўйинни давом эттира олмаслигини айтган. Ҳозирча Диашнинг "Челси"га қарши ўйиндаги иштироки сўроқ остида. Бундан ташқари, Родри сентябрда сафдан чиққан ва тахминан апрель ойи бошларида сафга қайтиши кутилмоқда. Шунингдек, Оскар Бобб ҳам августда жароҳат олганди. Айни дамда у тикланиш жараёнининг сўнгги босқичида ва келаси ой бошларида ўйинларда иштирок этишга тайёр бўлади. 



"Челси" 

"Аристократлар"дан Уэсли Фофана бироз узоқроқ муддатга сафдан чиққан. Шунингдек, Бенуа Бадиашиле ҳам декабрь ойи ўрталарида сафдан чиққанди ва ҳали машғулотларга қайтмади. Леви Колуилл, Энцо Фернандес ва Ромео Лавия "Сити"га қарши ўйнаши мумкин. Уларнинг жароҳати у қадар ҳам жиддий эмас. 



Тахминий таркиблар 

Менимча, ўзбекистонлик мухлислар учун энг қизиқ жойига етиб келдик. Ҳимоядаги жароҳатлар ва ўйинчиларнинг жисмоний ҳолати билан боғлиқ муаммолар туфайли Абдуқодир Ҳусановни биз мазкур беллашувда асосий таркибда кўришимиз мумкин. "The Sporting News" нашри ҳам айнан шундай фикрда: 

"Ҳимоядаги муаммолар янги келганлар учун имконият яратади. Ҳусановнинг Лига 1'да тўплаган тажрибаси уни майдонга тушиш эҳтимоли борлигини англатади", - дейилади "The Sporting News" нашри ёзган мақолада. 

"Манчестер Сити"нинг тахминий таркиби: Эдерсон, Ҳусанов, Аканжи, Гвардиол, Люьис, Гюндоган, Де Брюйне, Грилиш, Фоден, Холанд, Мармуш. 

"Челси"нинг тахминий таркиби: Санчес, Жеймс, Адарабиойо, Колуилл, Кукурелья, Кайседо, Фернандес, Мадуэке, Палмер, Санчо, Жексон.