“Сити” Англия терма жамоаси футболчиси учун курашда “Юнайтед”ни ортда қолдирди

Англия футболида ўз ўрнига эга бўлган Манчестер шаҳрининг икки гранд клуби “Ноттингем Форест” ярим ҳимоячиси Эллиот Андерсон учун курашни давом эттирмоқда.

Daily Mail нашри маълумотига кўра, ҳозирги вақтда “Манчестер Сити” 23 ёшли футболчи учун курашда “Манчестер Юнайтед”дан  ўзиб кетган.

Ҳар икки клуб ҳам келаси ёзда “ўрмончилар” юлдузини ўз сафига қўшиб олишни режалаштирмоқда.

Бироқ агар футболчи ўз ниятини аниқ билдирса (Антуан Семеньо ҳолатида бўлгани каби), “Юнайтед” бу курашдан чиқиб кетиб, бошқа номзодларга эътибор қаратади.

Transfermarkt портали маълумотига кўра, Эллиот Андерсоннинг бозор қиймати 60 миллион еврони ташкил қилади.

Футболчининг “Ноттингем Форест” билан шартномаси 2029 йил ўрталаригача амал қилади.