“Сити” ашаддий рақиб “Арсенал” билан бир футболчини талашиб қолди

“Манчестер Сити” клуби дастлабки уриниши ўхшамаганига қарамай, “Ноттингем Форест” ярим ҳимоячиси Эллиот Андерсонни сотиб олиш бўйича музокараларни давом эттирмоқда.

Илк таклиф рад этилганидан кейин ҳам томонлар ўртасидаги алоқалар сақланиб қолмоқда.

Инсайдер Фабрицио Романонинг X ижтимоий тармоғида маълум қилишича, “ўрмончилар” англиялик футболчи учун 116 миллион евродан ортиқ маблағ олмоқчи.

Манба маълумотига кўра, агар Андерсон бўйича келишув амалга ошмаса, “Ньюкасл Юнайтед” таянч ярим ҳимоячиси Сандро Тонали “Манчестер Сити” учун янги вариантга айланади.

Шунингдек, Лондоннинг “Арсенал” клуби ҳам италиялик футболчини олишга жиддий қизиқиш билдирмоқда.

Тонали 2023 йил ёзида “Милан”дан “Ньюкасл Юнайтед”га ўтган эди. Ўтган мавсумда 26 ёшли футболчи барча мусобақаларда 53 та учрашув ўтказиб, 3 та гол ва 7 та голли узатма муаллифи бўлган.