“Сити”да жой тегмайди! Траффорд Доннарумманинг юртида ўйнайди

“Манчестер Сити”нинг захира  дарвозабонига айланиб қолган Жеймс Траффорд фаолиятини Италия чемпионатида давом эттириши мумкин.

Маълум қилинишича, англиялик посбоннинг таркибини жиддий тарзда кучайтиришга киришган “Ювентус” клубига ўтиш эҳтимоли тобора ошиб бормоқда.

Яқинда Англия миллий терма жамоасида дебютини нишонлаган 23 ёшли голкиперга доимий ўйин амалиёти керак. Хосеп Гвардиола ўтган ёз уни “Бёрнли”дан биринчи рақамли дарвозабон қилиш учун қайтарган эди.

Аммо кутилмаганда “шаҳарликлар”да тажрибали дарвозабон Жанлуижи Доннаруммани трансфер қилиш имкони пайдо бўлди ва клуб буни уддалади.

Қайд этилишича, “Ювентус” Доннарумманинг соясида қолиб кетаётган Жеймс Траффорд учун тахминан 20 миллион евро тўлашга тайёр.

Шунингдек, Жеймсда Англия Премьер-лигасида қолиш имконияти ҳам бор. Ҳозирнинг ўзида “Ньюкасл Юнайтед” ва “Астон Вилла” клублари унга иш беришга тайёр.

Жорий мавсумда Траффорд 15 та ўйинда иштирок этиб, 11 та гол ўтказиб юборган ва 7 марта дарвозасини дахлсиз сақлаб қолган. Футболчининг “Манчестер Сити” билан шартномаси 2030 йилнинг ёзига қадар амал қилади.