“Сити”дан кетадиган Бернарду Силванинг кейинги жамоаси номи ойдинлашди

“Манчестер Сити” сардори ва плеймейкери Бернарду Силва жорий мавсум якунлангач, клубни тарк этиши эҳтимоли ошиб бормоқда.

Topskills Sports UK нашри маълумотига кўра, “шаҳарликлар” португалиялик футболчи билан шартномани узайтирмайди, шу боис ёзда у эркин агентга айланади.

31 ёшли футболчини “Бенфика” ўз сафига қайтаришга жиддий қизиқиш билдиряпти. “Бургутлар” ўзлари тарбиялаган ярим ҳимоячининг вакиллари билан музокара бошлагани айтилмоқда.

Шунингдек, Бернарду Силва атрофидаги вазиятни “Барселона”, “Пари Сен-Жермен”, “Ювентус”, “Галатасарой” ва Саудия Арабистони клублари ҳам кузатмоқда.

Бернарду Силва 2017 йилда “Монако”дан “Манчестер Сити”га 50 миллион евро эвазига кўчиб ўтган эди.