Слот бир гуруҳ ўйинчилар сотиб юборилишини айтди

Жорий мавсум чемпионлик унвонини муносиб ҳимоя қила олмаган “Ливерпуль” жамоаси бош мураббийи Арне Слот янги чемпионат олдида жамоа таркибида жиддий ўзгаришлар бўлишини маълум қилди.

Клуб бу чемпионат якунланганидан кейин узоқ йиллар жамоа етакчилари бўлиб келган Муҳаммад Салоҳ ва Энди Робертсон билан хайрлашиши аниқ бўлиб улгурган.

Арне Слот яна бошқа йўқотишлар ҳам бўлишини кутмоқда, чунки “Ливерпуль” ўтган ёзда бўлгани каби бу гал ҳам  яна  ўйинчи сотишга мажбур бўлади. Ўтган йили клуб катта харижларни амалга ошириш учун Кувин Келлехер, Жарелл Куанса, Тайлер Мортон, Бен Доак, Луис Диас ва Дарвин Нуньес каби ўйинчилар билан хайрлашган эди.

- Ҳозир биз Салоҳ ва Робертсонни йўқотяпмиз, худди Трентни йўқотганимиз каби. Клуб моделига кўра, янги ўйинчиларни трансфер қилиш учун, одатда биз таркибдаги футболчиларимизни сотиб юборишимиз керак.

Бу катта чақириқ. Ўтган мавсумда ҳам шундай бўлган ва бу ёзда яна такрорланади. Аммо кўп марта бу модел ишлашини кўрсатган ва биз жуда муваффақиятли бўлишимиз мумкин.

Биз жуда яхши ва иқтидорли ўйинчиларни имзоладик. Уларнинг барчаси Премьер-лигадаги иккинчи мавсумни соғлом ҳолда бошлашларига умид қилайлик.

Мен кўп марта айтганимдек, келажак жуда яхши кўринади, айниқса агар бу ёзда яхши ўйинчилар кетганидан кейин яна бир нечта зўр трансферлар амалга ошира олсак, - деди Слот Amazon Prime нашрига.