Собиқ ҳакам Мбаппе билан боғлиқ вазиятга баҳо берди: "Бу пенальти эмас"

Собиқ ҳакам Павел Фернандес Ла Лиганинг 31-туридаги "Жирона" — "Реал" (1:1) учрашувида Килиан Мбаппе иштирокидаги баҳсли эпизод юзасидан ўз фикрини билдирди.

Мазкур вазият ўйиннинг 88-дақиқасида содир бўлди. Мбаппе дарвоза майдони чеккаси томон ҳаракатланаётган пайтда "Жирона" ҳимоячиси Витор Рейс билан тўқнашди ва шундан сўнг майдонга қулаб тушди. Эпизодда ҳимоячи нафақат оёқ қисмида контакт қилган, балки қўли билан француз ҳужумчисининг юзига ҳам тегиб кетган.

Павел Фернандес ушбу ҳолат ВАРни ишонтирмаганини ва пенальти белгилаш учун етарли асос бўлмаганини таъкидлади.

"Витор Рейс, кўринишидан, Мбаппенинг юзига қўли билан енгил тегиб кетган. Шундан кейин француз гўё тирсак билан қаттиқ зарба олгандек газонга йиқилди. Бу вазият ВАРни ишонтирмади. Бу — пенальти эмас", — деб ёзди Фернандес.