"Сўғдиёна" "Локомотив"ни ниманинг эвазига мағлуб этди?

“Сўғдиёна” жамоаси ушбу турда ўз майдонида Тошкентнинг “Локомотив” клубини 2:1 ҳисобида мағлуб этди. Қизиғи, биринчи даврада пойтахтда ўтказилган баҳсда ҳам жиззахликлар шу ҳисобда ғалаба қозонишганди. Бугунги беллашувдан кейин “Сўғдиёна” жамоасининг сардори Санжар Рашидов ғалаба ниманинг эвазига қўлга киритилгани ҳақида шундай деди:

- Ўйин кўрган бўлсангиз, қизиқарли беллашув бўлди. Биз “Локомотив”га қарши учрашувга жуда яхши тайёргарлик кўргандик. Олдиндан бу қизиқарли ўйин бўлиши маълум эди.

“Локомотив” иккинчи даврада ҳали ютқазмаганди. Клубга янги мураббий келгани боис жамоа ўйини яхши томонга ўзгарди ва улар кучайишганди. Турнир жадвалида ҳам “Локо” билан бирин-кетин жойлашгандик. Ютган жамоа эса олдинги ўтиб олишини билиб тургандик.

Жамоавий ўйин ҳисобига муҳим уч очкони қўлга киритдик. Биринчи даврада Тошкентда ҳам 2:1 ҳисобида ютганимизга келсак, тўғриси, бунга эътибор бермадим. Бу – футбол. Унда ўхшаш натижалар бўлиб туради, - деди Рашидов.