"Сўғдиёна" "Пахтакор"ни мағлуб этишга қодир?! Улар буни қандай уддаламоқчи?

Мавсумни ғалабасиз бошлаган “Сўғдиёна” 4-турда мағлубиятсиз одимлаётган амалдаги чемпион – “Пахтакор”ни ўз уйида қабул қилади.

“Сўғдиёна” кучли рақибга қарши бўлажак беллашувда мухлисларининг кайфиятини кўтармоқчи. Жамоа сардори Санжар Рашидовга ҳам “Пахтакор” билан баҳсда кўп нарса боғлиқ бўлади. Чунки у жамоасининг ҳужумларини бошлаб беришда муҳим роль ўйнайди. Ўз навбатида Сардор Рашидовнинг укаси жиддий баҳсга кўрилаётган тайёргарлик ҳақида фикр билдирди.

- Айни пайтда тайёргарлигимиз жуда яхши кетяпти, барчаси кўнгилдагидек десам ҳам бўлаверади. Мураббийларимиз томонидан айтилаётган барча кўрсатмаларга амал қилган ҳолда машғулотларда жиддий ишлаяпмиз. Муҳими, жамоамиздаги барча ўйинчиларнинг кайфияти зўр. Худо хоҳласа, “Пахтакор”га қарши баҳсда албатта ўзимиз ўйлаган натижага эришамиз.

Улуғбек Бақоев бошчилигидаги жамоанинг аслида мавсумни нима сабабдан омадсиз бошлагани кўпчиликни ҳайрон қолдирган бўлса ҳам ажаб эмас. Негаки, у ўтган йили ушбу жамоа билан 4-ўринни банд этганди. Бу йил эса аксинча ҳолат кузатилаётгандек. Аммо Санжар Рашидов ушбу муваффақиятсиз вақтинчалик ҳолат эканлигини ва ўтган йили ҳам мавсумни шунга ўхшаш старт билан бошлаганлигини эслатди.

- Хабарингиз бор, мавсум бошида жамоамизга яна янги футболчилар қўшилишди. Натижада таркиб шакллантирилди. Билсангиз, ўтган йилги чемпионатнинг бошида ҳам шунга ўхшаш омадсиз стартни амалга оширгандик. Кейинчалик эса футболчилар бир-бирига мослашиб кетгач, натижаларимиз ҳам ижобий кўриниш олиб, якунда 4-ўринни эгаллагандик. Бу йил ҳам жамоадошларимиз билан бир оила бўлиб, яхши натижаларга эришишимизга ишонамиз.

Хўш, “Сўғдиёна” клуби янги мавсумдаги илк ғалабасини қачон қўлга киритади? Бу қайси ўйинда юз беради? “Пахтакор”ни мағлуб этишга жиззахликлар қодирми? Ёки улар учун ушбу ўйинда дуранг ҳам ғалабага тенг ҳисобланадими? Бироқ Санжар Рашидов ўзига ишонган ҳолда ғалабадан бошқа нарсани ўйламаётгани ҳақида гапирди.

- Биласизми, ютқазмайдиган жамоанинг ўзи йўқ. Футболда ҳамма нарса бўлиши мумкин. Биз “Пахтакор” билан учрашувга жуда яхши тайёргарлик кўряпмиз. Нима бўлишини эса 14 июнь куни кўрамиз. Ниятимиз эса фақат ғалаба. Бундан бошқа нарса ҳақида ўйламаяпмиз. “Сўғдиёна” жамоасининг ҳозирги мақсади уч очкони қўлга киритиш.