"Сўғдиёна"да 7,5 йил фаолият олиб борган дарвозабон клубдан кетди

Жиззахликлар қалбида алоҳида ўрин эгаллаган легионер дарвозабон Милан Митрович клуб билан дўстона тарзда хайрлашди. Бу борада клуб матбуот хизмати маълум қилди.

Жумладан расмий хабарда шундай дейилади: "Сўнгги етти ярим йил давомида у дарвозамиз мустаҳкамлиги учун барқарор ўйин кўрсатиб келди. 2021 йилги Суперлига мавсумида жамоамиз кумуш медални қўлга киритишида, ОФК кубогидаги муваффақиятли иштирокимизда ва бир қатор муҳим учрашувларда Милан ўз ҳиссасини қўшди. Унинг меҳнати, фидойилиги ва профессионаллиги учун жамоамиз ҳамда мухлисларимиз номидан миннатдорчилик билдирамиз.

Милан Митрович Суперлигада 147 та ўйин, жами 13 189 дақиқа майдонда ҳаракат қилди. Ўзбекистон кубогида 15 та ўйин. ОФК кубогида 6 та ўйин, жамоа билан бирга ярим финалгача етиб борган.

Милан Митровичга кейинги фаолиятида омад тилаймиз", -дейилади клуб баёнотида.

Сербиялик дарвозабон кейинги фаолиятини ҳам юртимизда давом эттириши мумкин. Боиси, унга қизиқиш билдираётган жамоалар бор.