"Сўғдиёна"да нимани ўргангани, Жиззахдаги энг севимли жойи, терма жамоамизда ўйнаш имконияти...Ёхуд шартномаси тугаётган Милан Митрович кўп мавзулар ҳақида гапирди

Миллий чемпионатимизда легионерлар кўп. Лекин уларнинг орасида дарвозабонлари фақат битта. Сербиялик Милан Митрович “Сўғдиёна” жамоасининг дарвозасини қўриқлаб келмоқда. Юртимизда эса ундан бошқа хорижлик посбон йўқ.

Лекин айтиш мумкинки, Митрович савияли дарвозабон эканлигини ўз ўйинлари билан исботлаб келяпти. Масалан, “Сўғдиёна”нинг охирги ўйинида ҳам сербиялик дарвозабон жамоасини 100 фоизлик голлардан қутқариб қолганига гувоҳ бўлдик.

Унинг бир неча мавсумда бери Жиззахда фаолият кўрсатиб келаётгани ҳам бежиз эмаслигини тушуниб тургандирсиз. Муҳими, у ишончни оқлаб келяпти. Акс ҳолда клуб уни ушлаб ўтирмасди. Биз эса ушбу дарвозабонни ўқувчиларга яқинроқ таништириш мақсадида ўзи билан бир қатор қизиқарли мавзуларда суҳбатлашишга жазм этдик.

-  Сиз ҳақингиздаги маълумотни қидириш мақсадида “википедия”га кирсак, у ерда иккита Милан Митровични кўрамиз. Бири ҳимоячи. Сиз буни биласизми?

-  Ҳа, биламан. У ҳимоячи ва мендан уч ёшга катта. Бизни фақат исм ва фамилияларимиз бирлигигина умумлаштириб туради.

-  Иккинчи мавсумдирки,” Сўғдиёна”да тўп суряпсиз. Ўзингиз учун бу ерда нималарни кашф этдингиз?

-  Ҳа, бу менинг фаолиятимдаги ўзига хос даврдир. 2018 йили бу ерга келганимдан кейин ўзим учун кўп нарсаларни кашф этдим. Келган чоғимда клуб ўта мураккаб аҳволда бўлиб, лигада жон сақлаб қолиш учун кураш олиб борарди. Клубдаги кишилар мени ва яна тўрт ўйинчини бу ерга олиб келиб, вазиятни ўнглашга эришдилар. Бу ўз самарасини бериб, жамоа лигада жон сақлаб қолди. Шунинг эвазига раҳбарият мен билан тузилган битимни дарҳол узайтиришга қарор қилди. 2019 йил узоқ кутишлардан сўнг биз учун энг яхшиси бўлди, дейишим мумкин. Бунгача клуб турли лигаларда жон сақлаб қолиш учун кураш олиб борган экан. Сал бўлмаса, биз Осиё Чемпионлар лигасида тўп суриш имконига ҳам эга бўлардик. Бахтга қарши омад юз ўгирди. Футболда эса омад муваффақият калити ҳисобланади. Бизга шунингдек, ОФКда тўп суриш учун бироз етишмай қолди. Асосийси, майдонда боримизни бериб ўйнаганимиз учун бу раҳбарият ҳамда мухлисларга ёқди.

-  “Сўғдиёна”даги энг яхши дўстингиз ким?

-  Жамоамиз жуда аҳил. Шу боис кимнидир ранжитиб қўймаслик учун бирортасини энг яқин дўстим фалончи дея олмайман. Буни тўғри тушунинг. Биз бир-биримизни ҳурмат қиламиз ва клубда ўзимизни худди бир оиладек сезамиз.

-  Жиззах шаҳрининг қайси масканида бўлишни кўпроқ ёқтирасиз?

-  Жиззах – ўзим кўрмаган ўзига хос шаҳардир. Тан олишим керак, аввалига бу ерда менга осон бўлмаган. Айниқса, ҳаво ҳарорати +50 даражадан ошган пайтларда анча қийналганман. Кейинчалик аста-секинлик билан бутунлай янги шарт-шароитларга мослашиб бордим. Шаҳарнинг ресторан ва кафеларига боришни ёқтириб қолдим. Ишларим ҳам юришиб кетди. Зоминда бўлдим, у ернинг табиати менга жуда ҳам ёқди. Зоминни умрбод эслаб юраман.

-  “Сўғдиёна”даги фаолиятингиз илгари ўзингиз тўп сурган клублардан нимаси билан фарқ қилади?

-  Қайси клубда тўп сурмай, бор кучим билан 100 фоизга майдонда боримни бериб ўйнаганман. “Сўғдиёна”га таклиф қилишган кундан бошлаб менда ҳамма билан – менежмент, мураббийлар, ўйинчилар ҳамда мухлислар билан яхши муносабат юзага келган. Мен майдонда шундай позицияда тўп сураманки, биргина йўл қўйилган хато ҳам дарҳол кўзга ташланиб қолади. Дастлабки пайтларда маҳаллий иқлимга мослашишим оғир кечгани боис ўзимни анча ноқулай ҳис қилганман. Бора-бора шароитга кўниккач, ҳаммаси изига тушиб кетди.

-  Сизни дарвозабон бўлишга кўпроқ нима ундаган?

-  (кулганча) Тўп тепишни бошлаган чоғимда бошқа тенгқурларимдан йирик жуссам билан ажралиб турганим боис мени дарҳол дарвозага қўйишган. Ҳаммаси ҳазил, аммо дарвозада туриш менга кўпроқ ёқарди. Якуний қарор қабул қилишимда майдондаги бошқа позициялардан кўра, дарвозабонлик ўзимга кўпроқ мос тушишини англаб етганман.

-  Ўзбекистонлик дарвозабонлар орасида сизга ким ёки кимлар кўпроқ ёқади?

-  Юртингиздаги дарвозабонлар орасида яхшилари жуда кўп. Шу боисдан у ёки бу ҳамкасбим бошқалардан зўр, дея ажратиб кўрсатмаган бўлардим. Умуман, ҳар бир дарвозабоннинг ўзига яраша устунлиги билан бирга камчиликлари ҳам бўлади.

-  Агар Ўзбекистон терма жамоасида ўйнаш таклифи билан чиқишса, буни қабул қилган бўлармидингиз?

-  Бу жуда қийин савол. Болалигимда Сербияда ўйнаган бўлсам-да, негадир миллий термадан чорлов олмаганман. Ростини айтсам, Ўзбекистонда яхши дарвозабонлар кўплиги боис миллий термангиздан чорлов оламан, деб сира ҳам ўйламаганман. Шундоқ ҳам сизларда миллий термадан чақирув олишни кутаётган яхши посбонлар етарли. Башарти, менга мана шундай таклиф билан чиқишадиган бўлса, бу ҳақда ўйлаб кўраман.

-  Эшитишимча, сизда яхши таклифлар бор экан...

-  Ҳеч қандай таклифлар йўқ. Амалдаги клубим билан битим тузган эканман, ўз агентимга бошқа клублардан таклифлар бўлаётгани ҳақида айтмасликни сўраганман. Фақат шартнома ниҳоясига етганидан кейингина бошқа таклифлар устида бош қотиришим мумкин. Бунгача эса турли вариантлар ҳақида ўйлашга одатланмаганман. Менинг принципим мана шунақа.

-  Эҳтимол, бу сизнинг “Сўғдиёна”даги энг охирги мавсумингиз бўлар?!

-  Буниси охирги мавсумим бўладими ёки йўқми, билмайман. Менинг амалдаги шартномам 1 декабрга қадар тузилган. Фақат шундан сўнг ҳаммаси ҳал бўлади. Бунгача эса бошимни турли ўй-хаёллар билан қотириб ўтирмайман. Балки яна “Сўғдиёна”да қоларман, эҳтимол, бутунлай бошқа клубга кўчиб ўтарман...Юқорида айтиб ўтганимдек, амалдаги шартномам ниҳоясига етмас экан, агентим менга бошқа таклифлар хусусида чурқ этмайди. Битим ниҳоясига етаркан, шундагина иккимиз бамаслаҳат бирор-бир тўхтамга келиб оламиз.

-  Фаолиятингиз давомида ўзингиз билан бир клубда ўйнаган энг таниқли футболчилар ким?

-  Фаолиятим мобайнида шундай номга муносиб кўплаб футболчилар билан ўйнаганим боис кимнидир ажратиб кўрсатишим амримаҳол.

-  Самарқанд ва Бухоро шаҳарларини томоша қилгани бордингизми?

-  Ҳа, Самарқанд билан Бухорога бордим. Клуб олдидаги мажбуриятларимни бажариб, шундан сўнг менда бўш пайт бўлар экан, албатта саёҳатга чиқишни канда қилмайман. Самарқанд билан Бухоро жуда ҳам чиройли шаҳарлар бўлиб, у ерлар менга ниҳоятда ёқди. Мен доимо мана шундай тарихий шаҳарларга боришни ёқтираман.

-  Сиз учун дунёдаги энг чиройли шаҳар қаер ва қайси мамлакатга боришни истайсиз?

-  Очиғини айтсам, ўзимни ашаддий саёҳатчи деб атамаган бўлардим. Лекин гўзал ва номи одамлар тилидан тушмайдиган жойларга боришни истайман. Шунинг баробарида эртадан кечгача шаҳарни айланиб юриш негадир менга хуш келмайди. Майли, ўша шаҳар Нью-Йорк ҳам бўла қолсин.

-  Дарвозабон эканлигингизга қарамай, гол киритишингизга ҳам тўғри келганми?

-  Йўқ, фаолиятим давомида ҳамкасбларимни ранжитишимга тўғри келмаган.

-  Шундай дарвозабонлар борки, улар пенальтини бартараф этиш билан бирга ўзлари ҳам фурсати келса пенальти тепишга интилишади. Сиз ҳам шундай қила оалсизми?

-  (кулганча) Шу пайтга қадар менда пенальтини ижро этиш учун ҳеч қандай имкон бўлмаган. Мана шундай имконият тақдим этиладиган бўлса, у ҳолда 11 метрли нуқтадан зарба беришга иккиланиб ўтирмаган бўлардим. Бироқ дарвозам томон шу нуқтадан тўп тепишар экан, ички туйғумга таянган ҳолда тўпнинг йўналишини топишга ҳаракат қиламан.

-  Сиз учун энг яхши дарвозабон ким?

-  Илгари Икер Касильясни жуда ёқтирардим. Энди мен учун Марк Андре тер Штеген энг яхши дарвозабон ҳисобланади.

-  Бизнинг чемпионатда ниманидир ўрганиш мумкинми?

-  Ҳа, бор. Ҳар бир мураббийдан ниманидир ўрганиш мумкин. Чунки мутахассисларнинг ўйин борасидаги қарашлари турлича.

-  Оилангиз ҳам шу ердами? Улар ҳам янгича шарт-шароитга кўникиб бўлганларми?

-  Йўқ, улар мен билан эмас. Афсуски, оиламдагилар бу ерга кела олишмайди. Чунки катта ўғлим мактабга қатнайди. Кичиги эса болалар боғчасига боради. Менда дам олиш учун имкон пайдо бўлса, уларнинг олдига ўзим бораман.

-  Сизга миллий чемпионатимизнинг савияси ёқяптими?

-  Ҳа, ёқади. Бироқ эпидемияга қадар ҳаммаси бошқача эди. Пандемия туфайли эса кўп нарса бахтга қарши ўзгариб кетди. Энди ўйинлар томошабинларсиз ўтказиляпти. Вирус тарқалганидан кейин мажбурий танаффуслар жуда кўпайиб кетди. Афсуски, ҳаммасини борлигича қабул қилишимизга тўғри келади. Насиб қилса, чемпионатдаги қолган ўйинларни ҳам ниҳоясига етказамиз. Мана шунда мен таътилга чиққан ҳолда юртимга қайтиб бораман.