Сонга кутилмаган даъвогар пайдо бўлди

Жанубия Корея терма жамоаси аъзоси ва "Тоттенхэм" футболчиси Сон Хён Минга бир қатор Европа грандлари қизиқиш билдирмоқда. Улар қаторига Мюнхеннинг "Бавария"си ҳам қўшилди, деб хабар бермоқда "Football Insider" нашри. 

"Шпорлар" ўз етакчиси билан янги шартнома имзолашни пайсалга солаётгани Сонга бу каби қизиқишларнинг ортиб кетишига сабаб бўлаётгани айтилмоқда. Айни пайтда лондонликлар осиёлик ярим ҳимоячига ҳафтасига 200 минг фунт маошни ўз ичига олган 5 йиллик шартнома таклиф қилмоқда. 

Мюнхенликлар Сонни Санега рақобатчи сифатида олиб келмоқчи ва у учун асосий таркибдан ўрин берилиши кафолатланмаган. Шу боисдан, ушбу трансфернинг амалга ошиш эҳтимоли кам, деб баҳолашимиз мумкин. 

28 ёшли қанот футболчиси жорий мавсум АПЛнинг 28 учрашувида майдонга тушиб, 13 та гол ва 9 та ассистни ўз ҳисобига ёздириб қўйди. Унинг "Тоттенхэм" билан шартномаси 2023 йилгача амал қилади.