Спортчимиз яна финални кўзлаяпти

Қозоғистоннинг Чимкент шаҳрида теннис бўйича ITF мусобақалари тақвимидан жой олган эркаклар ўртасидаги халқаро турнирда ҳамюртимиз Сергей Фомин чорак финалга йўл олди.

М15 таснифига кирувчи ушбу мусобақанинг иккинчи даврасида Сергей Фомин ҳиндистонлик Кумаран Бҳаратга қарши кортга чиқди. Учрашувнинг биринчи сетида ҳисоб 3:0 бўлиб турган бир вазиятда рақиб теннисчи номаълум сабабларга кўра ўйинни давом эттиришдан бош тортди.  

Шу тариқа, 1/4 финал босқичига йўл олган С.Фомин энди ярим финал остонасида Бекхан Атлангериев билан рақобатлашади.

Шунингдек, теннисчимиз Сергей Фомин нейтрал теннисчи Павел Вербин билан жуфтлик баҳслари чорак финалида чехиялик Матьяс Черний ва Йонес Кучерага қарши кортга чиқди ва 6:4, 6:2 ҳисобида зафар қучди.  

Энди Сергей ва Павел ярим финал босқичида нейтрал теннисчи Иван Денисов ва польшалик Яса Шайрих тандеми билан куч синашади.