SPORTS.uz Belgrad-2021: Og‘ir vazn toifasidagi hamyurtimiz Lazizbek Mullojonov g‘alaba qozondi

Serbiyaning Belgrad shahrida boks bo‘yicha erkaklar o‘rtasida jahon chempionati bo‘lib o‘tmoqda.

Bugun kun doirasidan og‘ir vazn toifasidagi hamyurtimiz Lazizbek Mullojonov (+92 kg)ning jangi o‘rin olgan. U eronlik Puria Amiri bilan jang o‘tkazadi. Bu jang 18:40dan keyin start oladi.

Lazizbek Mullojonov jahon chempionatida "Tokio-2020" chempioni Bahodir Jalolovning o‘rniga ishtirok etmoqda.

Bokschilar ringga chiqib kelishdi. Hamyurtimiz ko‘k rangli formada, uning raqibi qizil rangli libosda ringga ko‘tarildi.

Birinchi raund boshlandi.

Lazizbek Mullojonov dastlabki raundni yaxshi o‘tkazdi. Ketma-ket zarbalar yo‘llab, raqibini qiynab qo‘ydi. O‘ng va chap qo‘lda birdek zarba bera oladigan og‘ir vazndagi hamyurtimiz ilk raundni hech ikkilanishsiz o‘z foydasiga hal qilib qo‘ydi. 

Birinchi raund yakunlandi.

Ikkinchi raund boshlandi.

Vakilimiz ikkinchi raundda ham ancha faollik ko‘rsatdi. Chap qo‘l orqali ikki bor aniq zarba berdi. O‘ng qo‘lida esa uch marta kuchli zarba yo‘lladi. O‘z navbatida eronlik bokschi ham qarshilik ko‘rsatdi. Bo‘shashmaslik kerak!

Ikkinchi raund yakunlandi.

Uchinchi raund boshlandi.

Uchinchi raundda eronlik bokschi ancha jonlidi. Natijada o‘z hisobiga qimmatli ochkolarni yozdirib qo‘ydi. Jang yakunlandi.

Hakamlar hamyurtimizning g‘alabasini qayd etishdi - 4:1. Lazizbek keyingi bosqichda!!!