SPORTS.uz Belgrad-2021. Qozog‘istonlik bokschilar katta miqdordagi pul mukofotlari bilan taqdirlanadi

Serbiyaning Belgrad shahrida boks bo‘yicha erkaklar o‘rtasidagi jahon chempionati yakunlandi. 5-6 noyabr kunlari finallar o‘tkazildi, 13 ta vazn toifasida g‘olib va sovrindorlar aniqlandi.

Musobaqada Qozog‘iston terma jamoasi 5 ta medalni qo‘lga kiritdi (2 ta oltin, 2 ta kumush va bitta bronza). Natijada qozog‘istonliklar umumjamoa hisobida Kubadan so‘ng ikkinchi o‘rinni egalladi.

AIBA tashkiloti g‘olib va sovrindorlarga mukofot pullarini e’lon qilgandi. Unga ko‘ra 1-o‘rin sohibi 100 ming, 2-o‘rin egasi 50 ming va 3-o‘rinni band etgan bokschi 25 ming AQSh dollariga ega bo‘ladi.

Shuningdek, Qozog‘iston boks federatsiyasi prezidenti Kenes Rakishev chempionlarni 70 ming AQSh dollari, kumush medal sohiblarini 50 ming AQSh dollari va bronza medali egasini 30 ming AQSh dollari bilan taqdirlaydi. Bu haqda Qozog‘iston boks federatsiyasi rasmiy saytida xabar berildi.