SPORTS.uz талқини бўйича топ-5 чемпионатлар ҳафта рамзий терма жамоаси

Мураббий: Рой Хожсон (“Кристал Пэлас”)

Ҳар йили турли клублар мавсумда омадли старт олади. Улар эгаллаб турган ўринлар қанчадир муддат бизни ҳайратда қолдиради. Сўнгги даврларда АПЛ миқёсида фақат “Лестер” ўз “эртаги”ни рўёбга чиқара олди. Қолганлар эса, тез орада ўз поғоналарига равона бўлаверди.

“Кристал Пэлас” 2 та турдан сўнг 6 очко тўплаб 5-ўринда бораётгани у қадар ҳайрон қоладиган нарса эмас. Аммо бундай натижага эришган яна 4 жамоа орасида ўртамиёналарнинг йўқлиги ажабланарли. Қолаверса, лондонликлар 2-турда “Манчестер Юнайтед”ни енгиб, 3 очкога эга чиқди. Стартда ҳам осон рақиб билан тўқнаш келди, дея олмаймиз. “Саутгемптон”га қарши беллашувда Хожсон шогирдлари минимал ҳисобда зафар қучди. 

Ушбу турда энг яхши мураббий, дея эътироф этишимиз учун Жозе Моуриньо (“Тоттенхэм”), Карло Анчелотти (“Эвертон”) ва Альгуасил Иманол (“Реал Сосьедад”) каби номзодлар ҳам мавжуд эди. Аммо Хожсон варианти бизни кўпроқ ўзига жалб қилди. 

Дарвозабон: Алиссон (“Ливерпуль”)

Турнинг энг марказий беллашувида 2 та гол киритган Манени рамзий терма жамоамизга кирита олмадик. Шу сабабли, “Челси”га қарши ўйиндаги мерсисайдликларнинг ажойиб ғалабасига ҳурматимизни изҳор этиш мақсадида Алиссонга дарвозани ишониб топширдик. 

У бунга лойиқ ҳаракатларни амалга оширишга ҳам муваффақ бўлди. Пенальтиларда деярли адашмайдиган Жоржиньо бразилиялик кипер олдида ожиз қолди. Шу орқали, Беккер ўз жамоасини сўнгги дақиқалар ҳаяжонидан қутқариб қола олди. 

Чап қанот ҳимоячиси: Тео Эрнандес (“Милан”)

“Реал”га керак бўлмаган чап қанот ҳимоячиларининг нақадар кучли эканини кўряпсизми?! Аслида, уларда ҳеч қандай айб йўқ. Шунчаки, Марсело ва Ферлан Менди “Қироллик клуби” услубига кўпроқ мос тушади. 

Тео учун “россонерилар” таркиби яхшироқ вариант. Бу ерда унинг меҳнатини қадрловчилар кўпроқ. У ёшлигини “Бернабеу” захира ўриндиғида эмас, “Сан Сиро” майдонида ўтказишни танлади ва айтишимиз мумкинки, тўғри қарор қабул қилди. 

Бугун у Пиоли жамоасида алмаштириб бўлмас етакчи. Ҳимояда қанчалик ишончли бўлса, ҳужумда ҳам бирдек фойдали. 

Марказий ҳимоячи: Эзри Конса (“Астон Вилла”)

Ўтган мавсумнинг энг ҳайратланарли жамоаларидан бирини аранг АПЛда жон сақлаб қолган клуб таслим этиши ҳам қайсидир маънода сенсация. Крис Уайлдер дарвозабонидангина айрилди ва унинг ўрнига бошқа бир яхши посбон олиб келинди. Ремздейл “Борнмут”дан келганига қарамасдан, “туманли альбион” биринчилиги доирасида яхши дарвозабонлар сирасига киради. 

Конса эса, ўша учрашувда киритилган ягона гол муаллифи сифатида рамзий терма жамоамиздан ўрин олмоқда. 

Марказий ҳимоячи: Леонардо Бонуччи (“Ювентус”)

“Ювентус” анча чиройли ғалабани қўлга киритди. “Сампдория”га қарши учрашувда А Сериянинг исталган клуби қийинчиликка учрайди. Квалярелла ҳужумда турар экан, ҳар қандай мудофаа ҳам хушёр тортиши талаб этилади. 

Бонуччи эса, ҳимоядаги ишларини тўла-тўкис адо этиш билан бир қаторда, ҳужумга ўтиб гол ҳам уриб келди. 

Ўнг қанот ҳимоячиси: Тимоти Кастань (“Лестер”)

Дебютидаёқ гол урган футболчининг юлдузли ўйинлари олдинда, шекилли. “Бёрнли”га қарши кескин беллашувда у нақд 2 та голли узатмани амалга оширди. 

Ушбу узатмалар “тулкилар”нинг ғалабасини таъминлаб берди. “Кинг Пауэр”га йиғиладиган футбол мухлислари учун яна бир севимли футболчи пайдо бўлмоқда. 

Марказий ярим ҳимоячи: Маркиньос (ПСЖ)

“Ницца”га қарши кечган баҳсда биз ўзимиз кўришга ўрганиб қолган ПСЖни кўрдик. Чиройли ғалабага эришган Париж клубидан ҳам битта футболчи рамзий терма жамоамиздан жой олиши керак, деб ҳисобладик. 

Маркиньос Силвадан кейин жамоанинг ҳақиқий етакчисига айланди. Энг муҳими, у Тухелга супер қулайлик яратадиган даражада универсал. У марказий ҳимояда ҳам, ярим ҳимояда ҳам ўйнайверади. Бош билан ўйнашда анча яхши кўринмоқда. 

“Ницца” дарвозабони ҳам унинг голидан бебаҳра қолмади. 

Марказий ярим ҳимоячи: Жошуа Киммих (“Бавария”)

Киммихнинг супер ўйини “Шальке”га қарши баҳсда амалга оширган 2 та ассисти билангина чекланиб қолмайди. У қолган 6 та голда ҳам ҳужумнинг қайсидир бўғинида фаол ҳаракат қилди. Европанинг топ-клублари трансфер сиёсатини “Бавария”дан ўрганса арзийди. 9 млн евродан ҳам камроқ суммага жамоага олиб келинган Жошуа бугун мюнхенликларга нималарни ҳадя этмоқда!

Чап қанот вингери: Сон Хён Мин (“Тоттенхэм”)

Қитъадошимиз ҳар мавсум қайсидир иши орқали мухлисларни ҳайратда қолдиришни яхши кўради. Ўтган мавсумдаги рейди ҳали ёдингиздан кўтарилиб улгурмагандир. Бу сафар эса 40 дақиқа ичида 4 та гол киритиб, жамоасига ажойиб ғалаба тақдим этди. 

“Тоттенхэм”га бу ғалаба нақадар муҳим эканлигини барчамиз яхши англаб турибмиз. Регилон ва Бэйл билан кучайгунча ҳам максимал даражада очко ишлаб олиш муҳим. 

Ўнг қанот вингери: Серж Гнабри (“Бавария”)

Немис форварди “Шальке”ни умуман аяб ўтирмади. Стартдаёқ Бундеслиганинг ўзига яраша катта клубини бу қадар йирик ҳисобда ютган “Бавария”дан келгусида янада кучли ўйинларни кутсак бўлади. Серж эса бу мавсум бемалол тўпурарлик учун курашиб кўрса ҳам бўлади. Бу йўлда унга Левандовски ва Холанд муносиб рақобат уюштиради.

Марказий ҳужумчи: Доминик Калверт-Льюин (“Эвертон”)

“Эвертон” бу мавсум ростдан ҳам кучайгани кўриниб турибди. Хамес трансфери, дастлабки икки ўйинга қараб хулоса қиладиган бўлсак, ўзини оқлади. Колумбияликнинг ўзи ҳам кўнгли тўлиб футбол ўйнаётган бўлса керак. Доминик эса, бу мавсумда тўпурарликни мақсад қилган кўринади. Биринчи учрашувда ҳам айнан у ғалаба голига муаллифлик қилганди. Ўтган гал уни рамзий терма жамоамизга кирита олмагандик. Мана, бу тур ўзидан бошқа номзодларга “нон” қолдирмади.

Марказий ҳужумчи: Харри Кейн (“Тоттенхэм”)

Моуриньо Кейнга танаффусда нималардир дегани аниқ. У орқароқда тўпни қабул қилиш, қарамасдан уни Сонга узатиш бўйича аниқ кўрсатма олмаган бўлса, қандай қилиб голлар бу қадар бир хил бўлиши мумкин. Тасодифлар тасодифан бўлмайди, дейишармиди?! 

У 4 та ассист амалга оширишдан ташқари, учрашувни голсиз ҳам тарк этмади. Ҳақиқий топ-ҳужумчи!

*Изоҳ: Кеча бўлиб ўтган УЕФА Суперкубоги беллашуви ушбу рамзий терма жамоада инобатга олинмаган

Абдулвосид Валихонов тайёрлади