SPORTS.uz талқини бўйича топ-5 чемпионатлар рамзий терма жамоаси

Мураббий: Крис Уайлдер (3-5-2)

“Шеффилд” бундан олдинги учрашувларда ўзига ўхшамаётган эди. Ҳар ҳолда жорий мавсумдаги ўйинлари орқали премьер-лига дебютанти бизни ғалабаларига ўргатиб қўйганди. Умуман олганда, Уайлдер шогирдлари «Челси»га қарши ўйинда ҳам аслий услубига зид равишда ҳаракат қилди. Асосан, ҳимоявий ўйин намойиш этадиган клубнинг Лондон «аристократлари» дарвозасига жавобсиз 3 та тўп киритиши…
Крис Уайлдер жамоани шу қадар идеал тайёрлаганки, «Челси»нинг Дин Хендерсонни безовта қилган вазиятларини эслаш мушкул. У ушбу беллашувга одатдагидек 3-5-2 тактик схемасини танлади. Биз ҳам рамзий терма жамоамизда айни шу чизмадан фойдаланамиз.

Крис Уайлдер

Дарвозабон: Ян Облак

Словениялик посбон жамоасини том маънода қутқарди: камида 3 та вазиятда яққол голни дарвозасига йўлатмади. Деярли бир тайм мобайнида 10 киши бўлиб ҳаракат қилган «матрасчилар» якунда ғалабани илиб кетишди. 3-ўрин учун кураш ўта шиддатли кечмоқда. Айни дам «Севилья»да ҳам мадридликларда бўлганидек 66 очко мавжуд. Шундай қалтис вазиятда ҳамшаҳарларининг бир киши кам бўлиб қолган «Атлетико»дан гол ўтказиб юборишлари уларни нақадар ранжитганини тасаввур қилиш қийин эмас.

Облак

Марказий ҳимоячи: Федерико Фасио

Икки ашаддий рақибнинг ўзаро ўйинидан фойдаланиб қолиши керак бўлган римликлар биринчи бўлимни асабий тарзда якунлашди. Иккинчи таймда эса Фасио тезкор гол уриб, жамоасига хотиржамлик бахш этди. Акс ҳолда, «Рома» 5-поғонага кўтарилмаган бўлиши мумкин эди.

Фасио

Марказий ҳимоячи: Тоби Алдервейрелд

Шимолий Лондон бизники! Дербидан кейинги мемлар, карикатураларда энг кўп ишлатилган сўз айнан мана шу бўлди ва аксариятида Алдервейрелд бош ролда қайд этилган. «Арсенал»нинг голи «шпорлар»нинг биринчи голи сингари кутилмаган сюрприз маҳсули эди. Сўнгги нуқтани эса Тоби қўйди.

Алдервейрелд

Марказий ҳимоячи: Конор Коуди

«Вулверхемптон» принципиал ўйинда «Эвертон»ни мағлуб этди. Бу орқали у еврокубоклар учун йўлланмани қўлга киритишдаги рақобатчиларидан бирини бевосита курашдан чиқаришга эришди. Коуди бошчилигидаги ҳимоя чизиғи ушбу беллашувда на Ришарлисон ва на Калверт-Льюинга имконият бермади.
Энди Санту шогирдлари қолган 3 ўйинда ғалаба қозонган тақдирда Европа лигаси эшикларини тепиб кириши ҳам мумкин. Математик ҳисоб-китобларга кўра, Чемпионлар лигаси учун кураш ҳам тугамади…

Конор Коуди

Таянч ярим ҳимоячи: Рубен Перез

«Леганес»нинг Ла Лигада қолиш умидлари сўнишидан асраб қолган футболчи рамзий терма жамоамиздан ўрин олмаслиги мумкин эмасди. Биринчи таймдаги голи ўз йўлига. Ўйиннинг иккинчи ярмини бир киши кам бўлиб ўтказган жамоада Перез бешинчи ҳимоячига айланди. «Атлетик» ва «Реал»га қарши баҳслар энди ҳаёт-мамот курашига айланиб кетади.

Рубен Перез

Марказий ярим ҳимоячи: Артуро Видаль

«Барселона» пешқадамликни бой бергачгина ўзига келди. Шунда ҳам ғалабаларни аранг қўлга киритяпти. Артуро ҳимоядаги талотўпда ўзини йўқотиб қўймай аниқ зарба йўллай олди. Акс ҳолда, ўтган ҳар бир дақиқа каталонияликларни асабийлик ва умидсизлик томон бошлаб кетарди.

Артуро Видаль

Марказий ярим ҳимоячи: Лука Модрич

Модричнинг калит узатмаси ҳам Видалнинг голидан кам аҳамиятга эга эмасди. «Реал» учун кетма-кет икки марта Ла Лигада учинчи поғона билан кифояланиш фожиа. 34-чемпионлик акс этган роликларда хорватиялик хавбекнинг ушбу паси кўриниш бериб қолса ажаб эмас.

Модрич

Чап қанот вингери: Раҳим Стерлинг

«Брайтон»га қарши учрашувда Стерлинг хоҳласа ҳам, хоҳламаса ҳам гол урди. Айниқса, 3 голдан сўнг, брайтонлик мухлислар аччиқ табассум билан телевизорни ўчириб қўйган бўлса керак. Мавсумдаги учинчи хет-трик. Бу борада инглиз футболчиси АПЛда тенгсиз.

Стерлинг

Ўнг қанот вингери: Майкл Антонио

«Норвич»га қарши ўйин Антонионинг бенефисига айланиб кетди. Нақд 4 та голни айнан англиялик футболчи Тим Крул постига йўллади. Ушбу покер «канарейкалар»нинг премьер-лига ҳақидаги сўнгги ўйларини ҳам яксон қилиб, уларни Чемпионшипга равона қилди. «Вест Хэм» эса АПЛда қолиш учун муҳим бўлган очколарни йиғишда давом этади.

Антонио

Ҳужумчи: Дэвид МакГолдрик

«Челси»нинг йирик мағлубиятига 2 та гол билан ҳисса қўшган футболчи мавсум давомида 26 учрашувда майдонга тушди. Буни қарангки, мавсумдаги илк голини айнан 35-турга келиб, лондонликлар дарвозасига йўллади. «Лестер», «Эвертон» ва «Саутгемптон»га қарши беллашувлар Уайлдер шогирдлари учун ҳақиқий синовга айланади.

Девид Макголдрик

Ҳужумчи: Криштиану Роналду

Ҳа, «Аталанта» устунлик қилди. Ҳа, Роналдунинг иккала голи ҳам пенальтидан киритилди. Аммо факт шуки, унинг дубли жамоасини мағлубиятдан сақлаб қолди. «Лацио» мағлуб бўлишдан чарчамаяпти. Португалиялик юлдуз эса «Олтин бутса» учун курашда римликлар форварди Иммобилени таъқиб қилиб келмоқда. Олдинда ўзаро ўйин ҳам бор…

Роналду_1

Бу сафар ҳам рамзий терма жамоамиздан бир қатор футболчилар тушиб қолди: Алехандро Гомез, Лаутаро Мартинес ва Антони Марсьяль. Мураббий тактик схемаси ва рақобатчиларнинг супер ўйини бунга сабаб бўлди. Уларга келгусида омад тилаймиз.

Top5
Биз эса тобора якунига етиб бораётган Европа топ-5 чемпионатларининг қолган турларида ҳам рамзий терма жамоаларни аниқлаб борамиз.

Абдулвосид Валихонов тайёрлади

SPORTS.uz талқини бўйича кучли бешлик чемпионатлари рамзий терма жамоаси

Ретроспорт. Кортдан Голливудгача

Матнда хатолик топсангиз, ўша хатони белгилаб, бизга жўнатинг (Ctrl + Enter)