Суперклуб Алабани тўрт йиллик шартномага кўндирди

Мавсум якунланиши билан “Бавария”ни тарк этадиган универсал ҳимоячи Давид Алаба фаолиятини Испания чемпионатида давом эттиришга яқин турибди.

Европанинг бир неча гранд клублари билан музокара олиб борган ўйинчи “Реал”га оғзаки розилик бергани ҳақида хабарлар тарқатилмоқда.

Маълумотларга қараганда, 28 ёшли футболчи эркин агент сифатида Мадридга боради ва “Қироллик клуби” билан 2025 йилнинг ёзигача давом этадиган шартнома имзолайди. Унга кўра, австриялик ҳимоячи йилига 10 миллион евро маош олади.

Агар томонлар ўртасида битим имзоланса, мадридликлар Давиднинг отаси Жорж Алаба ва агенти Пини Захавига 20 миллион евро миқдорида бонус тўлаши керак бўлади.

Давид Алаба жорий мавсумда “Бавария” таркибида жами 35 та ўйинда майдонга тушиб, иккитадан гол ва голли пасга муаллифлик қилди.