Суперклуб: Маошинг пасайса, бизда ўйнайсан!

Англия Премьер-лигасидаги мавқеини тиклаб бораётган “Манчестер Юнайтед” ёзги трансфер ойнаси даврида таркибини кучайтиришга белбоғлаган ва керакли ўйинчилар рўйхатини шакллантирмоқда.

Манчестерликлар “Ноттингем Форест” юлдузи Морган Гиббс-Уайтни  ҳам жамоага таклиф этиладиган ўйинчилар рўйхатига киритди.  Бу футболчини олиш учун “Юнайтед” Морганнинг шартномасидаги 60 миллион фунт стерлинг миқдорида бадал пули кўрсатилган бандни ишга тушириши мумкин.

Морган Гиббс-Уайт аввал “Тоттенхем” билан боғлиқ трансфер можаросидан сўнг “ўрмончилар” билан янги шартнома имзолаган эди.

“Юнайтед” раҳбарияти Морганни жамоа етакчиси Бруну Фернандешга ўринбосар сифатида танлаган. Португалиялик юлдуз 2020 йилда жамоага келганидан бери “Манчестер Юнитед”нинг энг яхши футболчиларидан ҳисобланади. Бироқ 31 ёшли ярим ҳимоячининг “Олд Траффорд”даги келажаги аниқ эмас.

Хабарларга кўра, Фернандеш ёзда жамоани тарк этиши мумкин. Унга  Саудия Арабистони Про-лигасидан ва Европанинг қатор клубларидан қизиқиш борлиги айтилмоқда.

“Манчестер Юнитед” Гиббс-Уайтни кузатаётган бир нечта Премьер-лига клубларидан бири. Бироқ клуб янги жорий қилинган маош тизимидан чиқиб кетишни истамайди. Ўтган ёзда келган Брайан Мбеумо, Матеус Кунья ва Бенжамин Шешко ҳафтасига 150 минг фунт атрофида маош оладиган шартномаларни имзолаган. Гиббс-Уайт ҳам шунга яқин маошга рози бўлиши талаб этилади.

“Манчестер Юнайтед” клубдан катта маош оладиган Каземиро, Маркус Рэшфорд ва Жейдон Санчо билан тўлиқ хайрлашишга қарор қилган. Ҳарри Магуайр эса клубда қолишни истаса, маошини камайтирилишига рози бўлиши керак.