Суперклуб зўр ҳужумчини текинга қўлга киритди

Франция чемпионатида тобланган канадалик ҳужумчи Жонатан Дэвид бир неча клублардан таклиф олганига қарамай, “Ювентус” сафига қўшилишни маъқул кўрди.

“Лилль”да порлаган юлдуз Туринга эркин агент мақомида келди ва А Серия қудратли клуби билан 2030 йилнинг 30 июнигача давом этадиган битим имзолади.

Нуфузли манбаларнинг маълум қилишича, 25 ёшли форвард туринликлардан ҳар мавсум учун 6 миллион евродан маош оладиган бўлди.

Жонатан Дэвид футбол ўйнашни Канаданинг “Оттава” клубида ўрганган. Кейинчалик Европага йўл олиб, “Гент” тизимида маҳорат оширди. Бельгия клубининг асосий жамоасида икки йил тўп тепган футболчини “Лилль” 2020 йил 27 миллион евро эвазига ўз сафига қўшиб олган эди.

Дэвид клублар миқёсида жами 315 та учрашувда майдонга тушиб, рақиблар дарвозасини 146 маротаба ишғол қилган ва жамоадошларига 45 та голли пас узатган.

Шунингдек, моҳир ҳужумчи Канада миллий терма жамоаси сафида 67 та беллашувда рақиблар дарвозасига 36 та тўп киритган.