Суперлига-2019. Жамоаларнинг ғалабали ва мағлубиятли серияси (2-қисм)

Ўзбекистон Суперлигасининг 2019 йилги мавсумида қатнашган барча жамоаларнинг ғалабали, ғалабасиз, мағлубиятли ва мағлубиятсиз серияларини эътиборингизга ҳавола этишда давом этамиз. Куни кеча, чемпионатни кучли тўртликда якунлаган жамоаларнинг серияларини намойиш этган эдик. Бугун сиз 5-9-ўринларни эгаллаган клубларнинг сериялари билан танишасиз.

"Металлург" жамоаси мавсумни ёмон ўтказмади. Аммо, жамоа кетма-кет ғалабаларни қўлга киритишда фаоллик кўрсатмади. 15-16 кетма-кет 2 та беллашувда зафар қучган бекободликларнинг, бу энг узун ғалабали сериялари бўлди. Бекобод клубининг ғалабасиз серияси 7-турдан бошлаб, 13-тургача давом этди. Бу 7 та баҳсни ўз ичига олди. "Металлург" мавсумнинг сўнгги учрашувларида ўзининг энг узун мағлубиятсиз сериясини кўрсатиб берди. Яъни, бекободликлар 4 та беллашув, 23-26-турларда мағлубият аламини тортиб кўришмади. Ғалабали серия кўнгилдагидек бўлмагани билан бир қаторда, мағлубиятли серия ҳам узоқ давом этмади. "Металлург" клубининг 16 ва 17-турлардаги мағлубияти кетма-кет иккита ўйиндан иборат бўлган серияни ташкил этиб берди ҳолос.

Ғалабали серия: 2 та ўйин.
Ғалабасиз серия: 7 та ўйин.
Мағлубиятсиз серия: 4 та ўйин.
Мағлубиятли серия: 2 та ўйин.

 

"Сурхон" клубининг ғалабали серияси 3 та учрашувни ташкил этди. Сурхондарё клуби бундай натижага 2 бор, 8-10-турларда ва 18-20-турларда эришди. 13-17-турлар давомида "Сурхон" бирорта ғалабани қўлга кирита олмади ва бу билан, 5 та баҳсдан иборат бўлган энг узун ғалабасиз сериясини кўрсатиб берди. "Металлург", "Динамо", "Сўғдиёна" ва "Пахтакор"га қарши кечган 1-4-турлардаги учрашувларда мағлуб бўлмаган сурхондарёликларнинг 4 та ўйинни ўз ичига олган энг узун мағлубиятсиз серияси бўлди. "Сурхон" 13-15-турларда кетма-кет 3 баҳсда мағлуб бўлиб, ўзининг энг узун мағлубиятли сериясини қайд этди.

Ғалабали серия: 3 та ўйин.
Ғалабасиз серия: 5 та ўйин.
Мағлубиятсиз серия: 4 та ўйин.
Мағлубиятли серия: 3 та ўйин.

 

"Насаф" жамоаси қаторасига 3 та беллашувда ғалабани қайд этди. Бу ҳолат, 12, 13 ва 14-турларда "Металлург"га ва 2 бор "Сурхон"га қарши баҳсларда қайд этилди. "Аждарлар"га 17-21-турларда, кетма-кет 5 учрашувда ғалаба нашидасини суриш насиб этмади. ОФК Кубогининг 2011 йилги чемпиони якунланган мавсумда 2 маротаба 4 та баҳсдан иборат бўлган мағлубиятсиз серияни қайд этди. Бу 6-9 ва 11-14-турларда содир бўлди. 3-турда "Пахтакор" (1:2) га, 4-турда "Навбаҳор" (0:1) га ва 5-турда "Андижон" (1:3) га имкониятни бой берган қашқадарёликларнинг, бу энг узун мағлубиятли серияси бўлди. "Eтиборли томони, "Насаф"нинг сериялари "Сурхон" жамоасиники билан бир хил кўринишга эга бўлди.

Ғалабали серия: 3 та ўйин.
Ғалабасиз серия: 5 та ўйин.
Мағлубиятсиз серия: 4 та ўйин.
Мағлубиятли серия: 3 та ўйин.

 

2018 йилги Ўзбекистон кубогининг чемпиони АГМК клуби 2 бор 2 та учрашувда кетма-кет ғалабага эришди. 21-22 ва 24-25-турларда ушбу кичик серияни қайд этди. 8-11-турларда олмалиқликлар ғалаба қозонишни уддасидан чиқа олишмади. 4 учрашувни ташкил этаётган ўйинлар АГМКнинг энг узун ғалабасиз серияси бўлди. Олмалиқ клубининг мағлубиятсиз серияси 5 та беллашувдан иборат бўлди. Жамоа 21-25-турлар давомида барқарорликни кўрсатиб, имкониятсиз қолмади. 4-5-6-турларда ва 7-8-9-турларда АГМК қаторасига 3 та учрашувда мағлубиятга учради.

Ғалабали серия: 2 та ўйин.
Ғалабасиз серия: 4 та ўйин.
Мағлубиятсиз серия: 5 та ўйин.
Мағлубиятли серия: 3 та ўйин.

 

Юқори мақсадлар сари дадил интилган "Навбаҳор" клуби 2 бор 2 та ўйинни ташкил этган ғалабали серияни кўрсатиб берди. Бу, 4-5-турларда "Насаф" ва "Сурхонга қарши, 12-13-турларда эса "Бухоро" ва "Қизилқум"га қарши ўйинларда амалга ошди. Наманган жамоасининг энг узун ғалабасиз серияси 22-26-турларда қаторасига 5 та учрашувни ташкил этди. Мағлубиятсиз серияни қайд этиш бўйича "Навбаҳор"нинг натижасини аъло даражада десак ҳам бўлади. Наманганликлар 4-турдан бошлаб, 13-тургача ҳеч кимга мағлуб бўлишмади ва серия 10 та баҳсни ташкил этди. Жамоанинг энг узун мағлубиятли серияси бор-йўғи 2 та ўйиндан иборат бўлди. Бундай серия 3 бор кузатилди. 2 ва 3-турларда "Бунёдкор" ва "Локомотив"га, 18-19-турларда эса "Металлург" ва "Пахтакорга ҳамда 24 ва 25-турларда яна "Бунёдкор" ва "Локомотив"га имкониятни бой бериб қўйди.

Ғалабали серия: 2 та ўйин.
Ғалабасиз серия: 5 та ўйин.
Мағлубиятсиз серия: 10 та ўйин.
Мағлубиятли серия: 2 та ўйин.