Суперлига. "Машъал" — "Қизилқум" ўйини стадиондаги муаммо сабаб бошқа шаҳарда ўтказилади

Суперлиганинг 3-туридан ўрин олган "Машъал" — "Қизилқум" учрашуви Навоий шаҳрига кўчирилди. Шунингдек, жамоалар ўртасидаги жавоб баҳсига ҳам Навоий мезбонлик қилади.

Бунга "Машъал" клубининг Муборак шаҳридаги стадиони Суперлига талабларига жавоб бермаслиги сабаб бўлмоқда. Шунингдек, Қарши шаҳридаги Марказий стадионда олиб борилаётган таъмирлаш ишлари ҳали якунланмаган. Шу боис, "Насаф" ва "Машъал" жамоалари мавсумни Ғузор шаҳрида бошлаган эди.

Бироқ Суперлиганинг 2-туридан ўрин олган "Машъал" — "Локомотив" учрашувидан кейин "Шўртан" клубига қарашли стадион майдони шикастланди. Айни пайтда у ерда сифатли ўйин ўтказиш имконияти мавжуд эмас.

Маълум қилинишича, Ғузордаги стадионда дренаж тизими билан боғлиқ муаммо аввалдан мавжуд бўлган. 5 март куни ёққан кучли ёмғир эса бу камчиликни янада яққол кўрсатиб берди. Ҳозирда майдонни тиклаш ишлари олиб борилмоқда.

Лига эҳтиёт чораси сифатида клубларга бошқа стадионлар билан музокара олиб бориш зарурлигини билдирган.

Шунингдек, аввалроқ "Машъал" ва "Қизилқум" ўзаро келишув асосида учрашувлар жойини алмаштиришни сўраган, аммо ПФЛ бу таклифни рад этган.

Бундан ташқари, Бухородаги стадион ҳолати ҳам қониқарли эмас. Суперлига 1-туридан кейин "Бухоро" клуби расман огоҳлантирилган. Регламентга кўра, майдон ҳолати талабга жавоб бермаса, клубга нисбатан интизомий чоралар қўлланилиши мумкин.

Манба: ЎзПФЛ.