Суперлигада шундай ўйин борки, вақт қандай ўтиб кетганини сезмай ҳам қолсак керак...

Суперлиганинг 7-турида сизни яна бир водий дербиси кутаётганини билсангиз керак-а? Бу сафар Яйпанда “Турон” “Навбаҳор”ни қабул қилади. Буни янги водий дербиси деб ҳисобласак ҳам бўлаверади. Чунки яйпанликларни Суперлигада қатнашаётганига ҳали кўп бўлгани йўқ. Шунга яраша ўзаро учрашувлар ҳам олис тарихга бориб қадалмайди. Ҳар қандай ҳолатда ҳам бу водий дербиси. Дербилар қандай ўтишини ва ўтаётганини кўриб турибсиз.

Бу ўйин айниқса “Турон” учун жуда қадрли ва аҳамиятли. Нега деганда, яқинда Яйпан жамоасига россиялик Денис Бушуев бош мураббий этиб тайинланди. “Навбаҳор”га қарши баҳс эса унинг “Турон”даги дебютига айланади. Ҳар қандай мураббий янги жамоасидаги илк ўйинни ғалаба билан бошлагиси келади. Бусиз ҳам барча “Турон” янги мутахассис қўл остида қандай ўйин кўрсатишига қизиқяпти. Лекин танганинг орқа томони ҳам бор. Янги мураббийнинг услубига мослашишга улгуришадими? Бунга ҳам маълум вақт керак бўлишини биласиз. Лекин яна бир жиҳатини унутмаслик керакки, бундай дербиларда исталган жамоа борини беради ва айниқса, майдонда катта иштиёқ эвазига тўп суришлари шубҳасиз. Рақиб “Навбаҳор” бўлса, ўйинчиларга ортиқча мотивациянинг ҳам кераги бўлмай қолади.

Юқорида айтганимиздек, бу жамоаларнинг ўзаро учрашувлар тарихи узоққа бормайди. Ҳаммаси яқиндагина бошланган. “Турон” ўтган йили про лигада ўйнади. Ундан олдинги, 2021 йилги Суперлигада ўтказган дебют мавсумида “Навбаҳор”га қарши иккита баҳсда майдонга тушган. Ўшанда Намангандаги учрашувда ҳисоб очилмаган. Яйпанда “Турон”га қарши баҳсда “Навбаҳор” 1:0 ҳисобида ғалаба қозонган.

Яна бир гап: “Турон”да “Навбаҳор”нинг собиқ футболчилари тўп сурмоқда. Биринчи навбатда Азим Аҳмедов тилга олинади. Наманганликларнинг кўп йиллик сардори ва етакчиси ўтган мавсум якунига етганидан сўнг “Навбаҳор”ни тарк этди. Бу йил эса “Турон”да фаолиятини давом эттирмоқда. Бундан ташқари, Раҳим Даврон, Қувондиқ Рўзиев, Хуршид Мухторов, Хушнуд Авилов сингари илгари “Навбаҳор” шарафини ҳимоя қилган футболчилар энди собиқ жамоасига қарши майдонга тушадилар. Улар учун мазкур баҳснинг мавқеи ва аҳамияти ўзгача касб этиши муқаррар. Айниқса, Аҳмедов бундай ўйинларда бош ролга чиқади. Чунки Наманган фарзанди, “Навбаҳор”га меҳнати сингган йигит. У наманганлик ишқибозларнинг меҳрини қозонган. Энди ўзи учун қадрдон клубига қарши тўп суришини кузатиш янада қизиқ.  

Қизиғи, ушбу тур олдидан ҳар иккала жамоа ҳам водий дербисида қатнашишди. “Турон” Фарғонада “Нефтчи” билан учрашувда охирги дақиқаларда урилган гол эвазига мағлубиятдан қутулиб қолди. “Навбаҳор” эса Наманганда “Андижон”ни қабул қилиб 1:0 ҳисобида ғалаба қозонди. Бу гал яна дерби доирасидаги учрашувда иштирок этишади. Биласиз, “Навбаҳор” Самвел Бабаян бошчилигида фақат ва фақат чемпионлик учун кураш олиб бормоқда. Аммо ортда қолган 6 та турнинг 2 тасида наманганликлар ютқазишга улгурдилар. Иккаласи ҳам сафардаги ўйинларда бўлиб, “Пахтакор” ва ОКМКга мос равишда 2:1 ҳисобларилда имкониятни бой берди. Ўз майдонида эса дарвозаси дахлсизлигини сақлаб қолган ҳолатда рақибларини мағлуб этиб келмоқда. “Навбаҳор” ҳозирча ушбу чемпионатда сафарда ҳали ютгани йўқ. Дербида ёқимсиз сериясига чек қўйишини ашаддий ишқибозлари интиқлик билан кутмоқда.

Майдонда иккала жамоа чинакам жангга киришиши шубҳасиз. “Турон” дастлабки ғалабасига эришиш учун, “Навбаҳор” бўлса меҳмонда ҳам уч очкони олиш иштиёқида майдонда курашадилар. Якуни қандай бўлишини билмадигу, лекин вақт қандай ўтиб кетганини сезмай ҳам қолсак керак.   

Шуҳратбек Жўраев.