Superligada turning markaziy o‘yini tahlili. Diqqat markazimizda “Surxon” – “Nasaf” to‘qnashuvi

Bir necha soat avval SPORTS.uz saytida yangi loyiha borasida xabar berib o‘tgandik. Unda Qatarda faoliyat yuritayotgan hamyurtimiz, ko‘pchilik yaxshi taniydigan mutaxassis Alisher Nikimbaev bilan ham hamkorlikda yo‘lga qo‘yilgan Superligada turning markaziy o‘yini tahlil qilindi.

Loyihaning ilk sonida “Surxon” – “Nasaf” uchrashuviga e’tibor qaratildi. Unda Alisher Nikimbaev quyidagilarni bayon etdi.

- Nega “Surxon” – “Nasaf” uchrashuvi men uchun turning markaziy o‘yini? Sababi, bu ikki jamoaning ochkolari bir xil edi. “Lokomotiv” yutqazsa, ikkalasidan qaysi biri o‘zaro bellashuvda yutsa oldinga o‘tardi. “Temiryo‘lchilar” bilan oradagi farqni kamaytirib, 3 ochkoga keltirishi mumkin edi. Shuning uchun ushbu bahsni bellashuvdan avval markaziy deb o‘ylagandim. Lekin o‘yin sifati bo‘yicha buni markaziy uchrashuv deya olmayman. Chunki, termizliklar bunaqa xatolari bilan 3-o‘ringa ko‘tarilishga munosib emaslar. 3-o‘rinda bugungi vaziyat bo‘yicha keyingi yili OChLda qatnashadigan jamoa bo‘lishi kerak. “Surxon” qarshiliklarga ko‘rsatgan o‘yini bilan xalqaro maydonda ishtirok etishga munosib emas. Uchta golda ham qo‘pol xatolar tufayli “Nasaf” gollar urgan.

Birinchi golda darvozabon xatoga yo‘l qo‘ydi. Ikkinchisida himoyachi burchakdan to‘p tepilgan paytda ishonchsiz harakat qilib, yiqilib tushdi va “ajdarlar” futbolchisi raqibning hech qarday qarshiligisiz bemalol darvozani ishg‘ol etdi. Bu bilan gol osonlikcha urildi demoqchi emasman. Lekin eng asosiysi, hujumchi jarima maydonida to‘pni osonlikcha qabul qilib olgan.

Uchinchi gol qarshi hujumda urilsa-da, markaziy himoyachi pozitsiya tanlashda xato qildi. Chunki himoyachi bir yoki ikki qadam oldinda bo‘lganda, raqib o‘yindan tashqari holatga tushardi. Qolaversa, ikkinchi markaziy himoyachi sherigining yonida bo‘lishi kerak edi. Shunda hujumchi darvozabon bilan birga-bir vaziyatga chiqmasdi.

Umuman olganda, “Surxon” bugungi kunda turnir jadvalining yuqori o‘rinlarida yurgani ushbu bellashuv orqali bu o‘ringa munosibmasligi ko‘rindi, - deya fikr bildirdi Alisher Nikimbaev.

Ma’lumot o‘rnida, Termizda mezbonlarning mag‘lubiyatidan so‘ng ko‘p ming sonli muxlislar jamoadan mamnun emasliklarini, klubni “tozalash” kerakligini so‘rab namoyish o‘tkazishgani aks etgan videolar ijtimoiy tarmoqlarda tarqaldi. O‘z navbatida ishqibozlar yaqindagina klub murabbiyligiga olib kelingan Baxtiyor Ashurmatovning iste’fosini ham so‘rashgan. Bunga javoban klub rahbariyati kecha Ashurmatov bilan o‘zaro kelishgan holda shartnomani bekor qilishganini e’lon qildi. Shu tariqa, “Surxon”da murabbiylar almashinuvi davom etadi.

Termizliklar joriy yilning o‘zida bir nechta murabbiyni “sinovdan o‘tkazish”di. Jamoa mavsumga tayyorgarlikni Ilhom Mo‘minjonov qo‘l ostida boshladi. Biroq Mo‘minjonovning chetlatilishi tufayli “Surxon”ni Anvarjon Soliev boshqarishi ma’lum qilindi. Oradan hech qancha vaqt o‘tmay “rul”ni Andrey Miklyaev egalladi. Ammo uchinchi o‘rinda borayotgan paytda klubda yana murabbiy almashdi. Bu gal Baxtiyor Ashurmatov “Surxon” klubi ustoziga aylangandi. Ammo u ham Termizda ko‘p vaqt ishlamadi. Endi navbat kimga kelganligini yaqin orada bilib olsak ajab emas.