Суперлиганинг янги мавсумига қачон қуръа ташланиши маълум бўлди

20 февраль — шанба куни Суперлиганинг 2021 йилги мавсумига қуръа ташлаш маросими бўлиб ўтади. Маросим 18:15 дан бошлаб, “Спорт” телеканали орқали жонли эфирга узатилади. Бу ҳақда ЎзПФЛ расмий сайти хабар тарқатди.

2020 йилги пандемия сабаб, мусобақалар 20 декабрь санасига қадар давом этганидан хабарингиз бор. Шундан келиб чиқиб, қишки трансфер ойнаси ўтган йиллардаги каби 17 декабрда эмас, 4 январь санасида очилди ва у 12 мартга қадар давом этади. 

9 март куни эса Суперлиганинг илк тури бошланиши белгиланган. 22 мартдаги ФИФА кунига қадар Суперлиганинг 3 та тури бўлиб ўтади. Ҳозиргача Суперлиганинг июль ойига қадар бўлиб ўтадиган 13 та тури ҳамда Ўзбекистон кубогининг гуруҳ босқичи ва 1/8 финал учрашувлари саналари режага киритилган. Бироқ айни вақтда ОФК Чемпионлар лигаси ҳамда ОФК кубогининг марказлаштирилган форматдаги гуруҳ босқичига мезбонлик қилувчи мамлакатларни аниқлаётгани ва бунда Ўзбекистон шаҳарларининг ҳам эҳтимолий мезбонлиги бор эканидан келиб чиқиб, 2021 йилги мавсум тақвими бироз кейинроқ очиқланади.