"Сурхон" "чақилмас ёнғоқ" бўладими? Қандай легионерларга қизиқяпти? Клуб қайси ўрин учун курашади? Ёхуд бош мураббийдан режалар хусусида

Термизнинг “Сурхон” клуби ўтган йили йўл қўйилган хатолардан тўғри хулоса чиқардими ёки йўқми, буни янги мавсумда билиб оламиз. Ҳозирча ишлар бир текис давом этяпти.

Биласиз, яқинда клубга Руфат Акрамхўжаев бош мураббий этиб тайинланди. Айнан унинг бошчилигидаги мураббийлар штаби тайёргарлик ишларини олиб бормоқдалар. “Сурхон” бош мураббийи эса sports.uz учун ўзининг режалари билан ўртоқлашди.

“Сурхон”нинг таклифи мен учун ёқимли сюрприз бўлди”

-  Бош мураббийликка таклиф қилишлари мен учун кутилмаган бўлди. Авваламбор, “Сурхон” раҳбарига ушбу лавозимга таклиф қилиб, ишонч билдиргани учун миннатдорлик билдираман. Ўйинларимиз ҳамда натижаларимиз билан ишончни оқлашга ҳаракат қиламиз. Айниқса, мухлисларимизни ҳам ғалабали ўйинларимиз билан хурсанд қилишимиз керак. “Сурхон” мен учун бегона эмас. 2018 йили ҳам бу жамоада ишлаганман. Ўшанда илиқ таассуротлар қолган. Ҳар бир мураббийнинг футболга қараши бор. Биз ҳам ўзимиз танлаган йўлдан борган ҳолда яхши жамоа шакллантирамиз. Бир сўз билан айтганда, “Сурхон”нинг таклифи мен учун ёқимли сюрприз бўлди.

“Таркибнинг 80 фоизи ўзгарди”

-  Тайёргарлигимизнинг иккинчи ҳафтаси бошланди. Барчаси режа асосида давом этяпти. Селекция бўйича ишлар олиб бориляпти. Футболчиларни кўрикдан ўтказяпмиз. Раҳбарият олдимизга саккизталикка киришни мақсад қилиб қўйган. Шунга қараб таркибни шакллантиришга ҳаракат қиляпмиз. Жамоани у қадар ёшартириб юбормоқчи ҳам эмасмиз. Муҳими, келажакни ўйлаб жамоа тузяпмиз. Ёшлар билан тажрибали футболчиларнинг уйғунлашувини амалга оширмоқчимиз. Ана шунда иқтидорли ёшларда ҳам ўзларидаги ишонч ортади. Таркибнинг 80 фоизи ўзгарди. Хабарингиз бор, кўплаб ўйинчиларимизнинг шартномалари тугагани сабабли кетишган. Биз ўзимизнинг ўйин услубимизга мослаштирган ҳолда ўйинчиларни йиғяпмиз. “Чақилмас ёнғоқ” кўринишидаги жамоани тузмоқчимиз. Фақат бошлаган ишимизнинг мевасини бериши учун вақт керак. Барчаси бирданига содир бўлиб қолмайди. Ёшлар жамоамиздаги иқтидорлар асосий таркибга босқичма-босқич ўтишади. Режамиз бўйича 21 январда “Сўғдиёна”, 26 январда “Андижон” ҳамда 29-куни АГМК билан ўйнаймиз. Тайёргарлигимиз Тошкентда олиб борилади.

“Янги ўйинчилар ҳақида мураббийлар билан маслаҳатлашиб бир қарорга келамиз”

-  Суперлигада тўп сурган бир қатор ўйинчиларни кўряпмиз. Уларнинг ёши ҳар хил, лекин ўйин услуби ўхшаш бўлиши мумкин. Катта ва кичик ёшдаги футболчиларнинг ўйинларини кузатиб, кимнинг қандай имкониятга эгалигини ўрганган ҳолда мураббийлар штаби билан маслаҳатлашиб кимларни олиб қолиш бўйича бир қарорга келамиз. Агар 21 ёшли ўйинчи билан 29 ёшли футболчининг ўйини бир хил бўлса, унда 21 ёшдагисини олиб қоламиз. Нуриддин Ҳасанов, Асрор Ғофуров, Алишер Салимов, Хусниддин Ғофуров, Азамат Аҳмедов, Беҳруз Шойдулов ва яна бир қанча ўйинчиларимиз шуғулланишяпти.

“Россия, Украина, Сербия ва Эрондан легионерларни кўряпмиз”

-  Раҳбарият легионер ўйинчиларни таклиф қилишимизга рухсат берган. Бу масала бўйича ҳам ишлаяпмиз. Яқин кунларда ҳал бўлиб қолади. Ҳозирги пайтда музокаралар давом этяпти. Легионер олиш керак экан деб, кўр-кўрона таклиф қилавермаймиз. Бизнинг муҳитга тезроқ мослаша оладиган ўйинчиларни чорлаймиз. Биз кўраётган футболчилар Россия, Сербия, Эрон, Украина каби мамлакатлардан. Ўтган йилги легионеримиз - Дарко Станоевич билан ҳам музокара олиб боряпмиз. Уни яна жамоамизда қолиш эҳтимоли бор. Менимча, яқин кунларда барчаси маълум бўлиб қолади. Дарко билан келишиб қолсак, “Сурхон”да тўп суришига қарши эмасмиз, қайтанга у жамоани кучайтиради. Юртимиз футболини яхши билгани учун мослашишига кўп вақт кетмайди.

“Жамоани шакллантиришнинг ўзига яраша қийинчилиги бор”

-  Таркибни бошқатдан шакллантиришнинг ўзига яраша қийинчилиги бор, албатта. Жамоани йиғиб олганингиз билан барибир футболчиларни жипслаштириш керак бўлади. Мураббийлар нимани хоҳлаётганини уларга яхшилаб етказиб бериши учун ҳам барибир вақт зарур. Биз йиғаётган ўйинчилар етарли даражада профессионал. Агар тўғри йўналишда давом этсак, буни ҳам тезда енгиб ўтамиз.